Vetëm në këtë muaj dy shqiptarë u raportuan të vdekur në burgjet greke, një prej tyre prej dhunës së ushtruar ndaj tij dhe tjetri për shkak të vetëvrasjes.
Tashmë mësohet se, vdekja e një tjetër shqiptari në qelitë e shtetit helen po mbahet e fshehtë.
Sipas gazetarit Shpëtim Zinxhiria, një shqiptar është vrarë në burgun e Koridalos më 8 gusht të 2018-s, por ngjarja po mbahet e fshehur nga autoritetet greke. Mësohet se shqiptari 31-vjeçar F.I., nga Vlora, u vra në prag të lirimit.
Këtë njoftim e bën e motra, duke kërkuar arsyen përse u vra vëllai i saj dhe pse po hesht shteti shqiptar. Ende nuk dihet asgjë rreth identitetit të plotë të shqiptarit dhe rrethanave të ngjarjes.
Kujtojmë se vetëm gjatë vitit të kaluar mbetën të vdekur 16 shqiptarë në burgjet e shtetit fqinj.
