Princ Harry është vendosur sërish përballë Oprah Winfrey, këtë herë për t’u rrëfyer për shëndetin mendor dhe problemet që ka hasur gjatë jetës së tij. Ditën e sotme është publikuar një pjesë shumë e shkurtër nga ky rrëfim, i cili pritet të zbulojë detaje të tjera nga jeta e Harry-t.
“Të marrësh vendimin për të kërkuar ndihmë nuk është një shenjë dobësie. Në botën e sotme, më shumë se kurrë, është një shenjë fuqie”, shprehet Harry, i cili ka folur më herët për sfidat e tij të forta, veçanërisht pas vdekjes së nënës, Princeshë Dianës.
Gjithashtu në trailerin e kësaj interviste shfaqet për pak sekonda, Meghan Markle, e cila shihet e veshur me një bluzë që lexon “Rasing the Future” (Rrisim të ardhmen).
“Rezultatet e këtij viti do të ndihen për dekada. Nga fëmijët, familjet, bashkëshortët, bashkëshortet, nga çdokush”, shton Harry, teksa në ekran shfaqet një foto e Meghan duke i lexuar djalit të tyre, Archie-t.
Para disa ditësh princ Harry dha dhe një intervistë për Dax Shepard, ku foli për jetën e tij në pallatin mbretëror dhe pse vendosi të largohej prej andej.
“Nëse unë kam përjetuar një formë dhimbjeje ose vuajtje, për shkak të dhimbjes apo vuajtjes që ndoshta babai im ose prindërit e mi kanë pasur, unë duhej të sigurohesha që ta thyeja këtë cikël, që mos të trashëgohej tek të tjerët. Ka një dhimbje gjenetike që kalohet brez pas brezi kështu që ne si prindër duhet bëjmë të pamundurën që ajo që më ka ndodhur mua të mos ndodhë tek të tjerët”, u shpreh Harry.
