Prej ditës së djeshme, në mediat shqiptare zien lajmi i përdhunimit nga djali i deputetit të Partisë Socialiste, Rrahman Rrahja. Është ish-oficeri i Policisë së Fushë Krujës, Emiljano Nuhu i cili ka rrëfyer të gjithë ngjarjen për gazetarin Basir Çollaku.
Por si qëndron historia në të vërtetë?
Kreu i Partisë Demokratike Lulzim Basha publikoi pasditen e së mërkurës videon e plotë të denoncimit të-ish oficerit të policisë Emiljano Nuhu. Ky i fundit ka rrëfyer në një intervistë për gazetarin Baris Çollaku, detajet e hetimit që është zhvilluar nga ai për përdhunimin e Xhisela Malokut nga djali i deputetit të Partisë Socialiste, Rrahman Rrahja.
Sipas Emiljano Nuhos, Xhisela Maloku ishte rrëmbyer, kërcënuar me armë dhe përdhunuar nga Rexhep Rraja me 21 korrik të vitit 2018. Pasi vajza ka denoncuar në polici djalin e deputetit socalist, ka mbërritur deputeti i PS, Rrahman Raja së bashku me të birin dhe në sy të oficerëve e kanë nxjerrë nga komisariati vajzën ku e ka kërcënuar duke i vënë pistoletën në bark për të mos folur.
Sipas Nuhos, kreu i grupit parlamentar të PS-së deputeti Taulant Balla ka ardhur e ka liruar nga Komisariati i Fushë Krujës djalin e deputetit, ndaj të cilit ishte prerë fletë arresti.
Në video, Nuhu tregon gjithashtu se vëllai i deputetit i ka vënë pistoletën në kokë, ndërsa deputeti Taulant Balla i ka thënë me ironi: “Hiqe pistoletën nga koka se oficeri është djalë i mirë dhe gjithçka që ka ndodhur do të mbesë këtu”.
https://www.facebook.com/Ora.News.RTV/videos/482987465536238/
Ndërkohë që gazeta “Panorama” ka siguruar procesverbalin e firmosur nga oficeri i Policisë Gjyqësore, Emiljano Nuhu, i cila mban datën 30.07.2018, ku zbardhet dëshmia e shtetases Xhisela Maloku. Vajza pretendon se Rexhep Rraja, djali i deputetit të Partisë Socialiste, Rrahman Rraja e ka dhunuar fizikisht dhe e ka djegur me cigare në kofshë. Madje sipas saj nga dhuna që i është ushtruar në një dhomë hoteli ku e ka marrë nen kërcënimin e pistoletës, ajo ka humbur ndjenjat dhe nuk mban mënd nëse është abuzuar më të apo jo.
“Unë ndejta me të në hotel rreth një orë, gjatë kohës që ndejtëm në hotel më gjuajti e shpulla, me grushta dhe më drejtoi pistoletën. Më dogji me cigare në kofshë dhe më goditi në pjesën e koks me pistoletë. Mua më ra të fikët dhe u përmenda më vonë nuk më kujtohet a bëmë marrëdhënie seksuale, kur u përmenda po më merrte me të mira dhe më pas unë dola më para nga hoteli. Ai shkoi të paguaj lekët tek recepsioni dhe me erdhi poshtë tek makina, ku unë po e prisja duke më përfaqura dhe duke më bere lajka që unë mos të vija në polici për kallëzim.” – tha Xhisela në dëshminë e saj.
Në shkresën e siguruar nga “Panorama” theksohet se Xhisela Maloku ka marrë kërcënime deri me vdekje.
“’Do të të vrasim’, me vendosi në bark pistoletën, e mbushi dhe më tha që sot nuk ke shpëtim se na ke hapur shumë punë k*rvë e m*tit”, ka treguar Xhisela në dëshminë e saj.
Ndërkohë që ka reaguar edhe deputeti socialist Rrahman Rraja, i cili ka hedhur poshtë menjëherë akuzat e ngritura nga ish-oficeri i Policisë. Ai pranoi se ka pasur një denoncim nga një vajzë, me të cilën djali i tij ka pasur një lidhje dhe është ndarë. Sipas deputetit, vajza e nxitur nga xhelozia ka bërë në Polici një denoncim të cilin e ka tërhequr më pas.
Sakaq, deputeti socialist Taulant Balla ka dorëzuar një kallëzim penal për Lulzim Bashën, gazetarin Basir Çollaku si dhe ish-oficerin Emiljano Nuhu, për kryerjen e veprave penale si “shpërdorim i detyrës” apo edhe “kallëzim të rremë”.
Nga ana tjetër, kryetarja e LSI-së Monika Kryemadhi u ka bërë thirrje institucioneve përkatëse të marrin në mbrojtje Xhisela Malokun.
Burimi: Gazeta Panorama
