3 dhjetori njihet si Dita Ndërkombëtare e Personave me Aftësi të Kufizuara dhe në çdo vend kjo ditë shoqërohet me protesta për sfidat me të cilat këta njerëz përballen në shoqëri. Por Qendra Komunitare Multidisiplinare këtë vit ka vendosur të sjellë diçka ndryshe, duke pasqyruar në një ekspozitë talentin e fëmijëve të spektrit autik.
Ditën e sotme në kalanë e Tiranës, u hap ekspozita “Një shkëndije në errësirë” me piktura të punuara nga fëmijët autik. Brenda kalasë janë ekspozuar piktura të fëmijëve nga mosha 3-14 vjeç, të cilët kanë pasqyruar përmes tyre gjithë botën e brendshme.
Në ekspozitën “Një shkëndijë në errësirë” shfaqen rreth 60 piktura dhe disa bizhu të punuara nga duart e fëmijëve të spektrit autik. Drejtoresha e Qendrës Komunitare Multidisiplinare, Matilda Zizolli, e ka cilësuar këtë jo thjesht si një ekspozitë, por si gjithë bota e fëmijëve të spektrit autik.
“Kjo nuk është thjesht një ekspozitë, por është shpirti i 43 fëmijëve, të cilët gjatë përditshmërisë sonë e kemi të vështirë t’i kuptojmë nga diagnoza që ata kanë. Por kjo është një mënyrë për t’ju kuptuar shpirtin dhe emocionet e tyre dhe ata kanë gjithë sjellë gjithë ngjyrat e tyre brenda kësaj ekspozite”, është shprehur Zizolli.
Ekspozita “Një shkëndijë në errësirë” do të qëndrojë e hapur për 3 ditë me radhë.
