Teksa intervista e djeshme e Flavio Qarrit me këngëtaren Luar Arani bëri xhiron e rrjetit dhe jo për arsyet më të mira (lexo këtu), gazetari duket se nuk ka ndërmend të ndalet me këmbënguljen e tij për të mos pranuar se “shakaja” e tij tërësisht pa kripë (e bërë në momentin më të papërshtatshëm të mundshëm), në fakt ishte një gjest seksist për të cilin duhej të kërkonte falje publike.
Në emisionin e sotëm, Flavio shfrytëzoi sërish hapsirën mediatike që i është dhënë, për të ironizuar reagimet e personave e mediave (khëm-khëm neve) që kritikonin sjelljen e tij e për të thënë sërish se nuk ka ndërmend të kërkojë falje.
View this post on Instagram
Por teksa gazetari thirret lart e poshtë nëpër intervista televizive për të dhënë mendimin e tij për tema të caktuara që të bën të mendosh se zëri i tij është diçka që realisht ia vlen ta dëgjosh, deklaratat e fundit na bëjnë të mendojmë se në realitet, nga disa tema të caktuara siç është seksizmi, Flavio nuk merr aspak erë, ose dëshiron të duket si i tillë për t’i shndërruar në 5 ato 2-minutat e famës.
Ndaj për t’i shpjeguar edhe njëherë përse do ishte më e udhës të kërkonte falje për gjestin aspak të këndshëm që bëri ndaj Luar Aranit, le të ndalemi t’i shpjegojmë Flavios së ç’do të thotë në të vërtetë të jesh seksist.
Sipas fjalorit Merriam-Webster të cilit po i referohemi për një shpjegim sa më preciz, fjala “seksist” ka dy shpjegime: 1. Paragjykim ose diskriminim i bazuar tek seksi, veçanërisht diskriminimi ndaj grave; 2. Sjellje, kushte ose qendrime që mbartin stereotipe të roleve seksuale të bazuara tek seksi.
Besojmë gjerat nisin të qartësohen, çka do të thotë se pyetja-gjoja-batutë e Qarrit “Je lidhur me ndonjë boss droge që s’duhet ta dimë apo si është puna” për të marrë një përgjigje nga këngëtarja e cila qartazi nuk donte të fliste për jetën e saj private, mbart në vetvete nënkuptimin se vajzat e famshme që nuk dëshirojnë të bëjnë publike jetën e tyre sentimentale, duhet medoemos të jenë në marrëdhënie me “bosa droge”.
Një gjë e tillë rrjedhimisht, sipas stereotipit, shpjegon dhe mirëqenien e tyre apo jetesën në luks, ndërkohë që mjafton të shohësh profilin në Instagram të Luarit për të kuptuar se nuk pasqyron aspak një jetesë të tillë. Dhe besojmë që nuk do të dëgjojmë kurrë ndonjë moderator që të pyesë ndonjë këngëtar nëse është i lidhur me ndonjë bose droge, çka të dashur miq, shpjegon qartë seksizmin që nuk ka sesi të justifikohet me argumentin e shakasë.
Megjithatë, komentet seksiste e diskriminuese të Flavios nuk janë aspak gjë e re dhe për këtë mjafton një kërkim i thjeshtë në internet për të zbuluar se gazetari, zërin e tij e përdor kryesisht për të folur për “epidemi kuçkllëku” apo për t’i përgjithësuar zhveshjet joartistike të vajzave në Instagram me termin “kurvëri”.
Por krahas seksizmit, Qarri duket se ka nevojë të reflektojë edhe për bullizmin çka, ndonënse me shumë vonesë, është sërish një arsye për të kërkuar ndjesë publike. Në vitin 2016, Flavio ka marrë përsipër që opinionin e tij personal ta shndërrojë në një letër të hapur për Encën, e cila asokohe sapo kishte publikuar bashkëpunimin me Noizy-n “Bow Down”, po shijonte një prej momenteve më të suksesshme të karrierës dhe mbante koncerte non-stop në Shqipëri e jashtë saj.
Por Flavio, i bezdisur nga fakti që këngëtarja nuk ngurronte ta shprehte publikisht kënaqësinë për arritjet e veta, vendosi nga hiçi ta komentonte për pamjen e veçanërisht për peshën, duke bullizuar një vajzë 20-vjeçare që me shumë gjasa deri në atë ditë ka bërë më shumë para me këngë e koncerte sesa ç’do bëjë Flavio ndonjëherë në jetën e vet.
“Oh Zot, kjo është hera e parë dhe e fundit që flas për Encën. Betohem! Tani kjo vajzë e para e punës duhet të heqë dorë nga sufllaqet në 2 të natës. E dyta duhet të heqë dorë nga deliri i madhështisë dhe mirë do ishte të hiqte dorë edhe nga muzika. Çështja është Enca që ti mund të bësh ç’të duash. Të vazhdosh të hash sikur ke punuar vërtet, të delirosh sikur ke arritur ndonjë gjë vërtet dhe madje edhe të bësh sikur bën muzikë vërtetë.
Je e lirë të bësh ç’të duash. Lermë ama të të shpjegoj ca detaje të vogla nga hapësira publike dhe aq më tepër ajo muzikore. Ndjekësit në Instagram nuk janë as fansat e tu e as publiku yt. Zemra vogël, para se ta quash veten mbretëreshë, ki respekt për zonja si Nexhmije Pagarusha apo Vaçe Zela. E ke parë Nexhmijen? Është 90 vjeç dhe pa photoshop ta merr në kthesë në ditën tënde më të mirë. Sinqerisht do ia kisha lypur asaj para se të më shkonte mendja te ty.”-shkruante ai asokohe.
I dashur Flavio, falendero Zotin që jeton në Shqipëri, ku gratë e vajzat janë ende të zëna duke luftuar që të mos vriten e të mos përdhunohen, sepse të kishe fatin të jetoje në një vend qoftë dhe pakëz më të zhvilluar se Shqipëria, karrigen e gazetarit e moderatorit do ta kishe harruar me kohë.
