Më në fund një lajm i mirë për të gjithë studentët e Universitetit të Tiranës!
Nisur nga dita e sotme dhe në vijim të gjithë studentët në fjalë do pajisen me kartën studentore e cila mundëson një sërë shërbimesh falas apo kosto të reduktuara.
Falë bashkëpunimit mes Qeverisë dhe Bashkisë së Tiranës tashmë më në fund është realizuar kërkesa e bërë ndër vite nga studentët.
Kryetari i Bashkisë së Tiranës, Erion Veliaj ditën e sotme deklaroi ndër të tjera se brenda muajit korrik rreth 80 mijë studentë do të pajisen me kartën studentore.
Kjo e fundit do lëshohet pa pagesë dhe do jetë e rinovueshme për një vit të plotë.
“Secili prej studentëve ka një monitor pasqyrë, pra shikon çfarë po bën dhe punonjësja jonë. Një pjesë e madhe e stafit që kemi marrë për karta, janë vetë studentë, pra vetë punojnë si staf. Merret një kartë bosh, fillimisht skanohet barkodi, që pastaj mund të përdoret në çdo dyqan dhe në çdo shërbim tjetër. Pastaj vihet për printim me të dhënat e çdo studenti, ku jep të dhënat personale”, tha Kryetari i Bashkisë.
Ndërkohë çdo universitet do ketë në dispozicion dy operatorë të cilët do jenë të gatshëm të sqarojnë gjithçka për studentët duke filluar nga informacioni i përgjithshëm, apo plotësimi i të dhënave përkatëse e deri tek lëshimi i kartës. /tiranapost.al
