Një kinema e re në zonën e Laprakës në Tiranë, do të mbajë emrin e piktorit dhe arkitektit të ndjerë Maks Velo, i cili u nda nga jeta 3 javë më parë.
Kinemaja e Laprakës ishte projektuar që në vitet ’70, por pas viteve ’90 ishte lënë në harresë, e më pas ishte shkatërruar, për t’u zaptuar e kthyer në një hedhurinë. Arkitekti punoi deri vonë për rikonstruksionin e saj dhe sot ajo është gati të mirëpresë të gjithë artdashësit.
Në inspektimin e projektit së bashku me kryebashkiakun Erion Veliaj ishte edhe motra e Maks Velos, Diana, e cila tha me shumë emocione se kujtimi i tij dhe vepra artistike që la pas, do të mbeten të paharruara.
“Jam shumë e emocionuar, e gëzuar, e mallëngjyer, për këtë nder të madh që i bëni vëllait tim. Falenderoj kryetarin e bashkisë, faleminderit miqve italianë, falenderoj Ministrinë e Kulturës. Kujtimi i Maksit, vëllait tim, do të mbetet i paharruar”, tha ajo.
Kinemaja “Maks Velo” ka një sallë multifunksionale, e cila do të shërbejë për aktivitete të ndryshme si kinema, shfaqje, konventa, seminare, promovime librash, teatër, dhe organizimin e aktiviteteve të ndryshme kulturore nga nxënësit e Laprakës.
