Në laboratorin e ISHP-së po pritet përgjigjja e analizës për një rast të dyshuar me Koronavirus, për të cilin Drejtoresha e Institutit të Shëndetit Publik, Albina Fico, thotë se do të dalë negativ.
Në konferencën e mbajtur sot për mediat ajo tha se nuk dëshiron të japë përgjigjen 100% të saktë pa pasur në dorën përgjigjen zyrtare të analizës.
“Praktikisht kemi vetëm 1 që është duke u procesuar, gjasat janë negativ, por pa e parë me sy letrën negativ, nuk do e them”, u shpreh Fico.
Pas konsultimeve dhe trajtimit nga stafi mjekësor i trajnuar dhe specializuar, është marrë vendimi që këtij pacienti t’i bëhen analizat, edhe pse siç tha Fico, janë thuajse zero mundësitë që ai të dalë pozitiv.
Në vendin tonë janë konstatuar 6 raste të dyshuar si të infektuar, që pas kryerjes së analizës, rezultuan negativë.
E pyetur nëse ISHP ka mjaftueshëm kite për kryerjen e analizave për zbulimin e Koronavirusit, Fico tha se vetë ISHP ka bërë blerje të këtij mjeti të nevojshëm për zbulimin e virusit.
Por shtoi se duke qenë një institut që bashkëpunon me institucione ndërkombëtare, kanë ardhur kite edhe nga “MediLabSecure”, dhe priten furnizime të tjera nga jashtë.
/Report tv
