U zgjodh sot Kryeprokurorja e re e Shqipërisë. Pas votimit në Parlament, në një situatë të tensionuar, me protesta të shumta të opozitës, është zgjedhur me shumicë votash kryeprokurorja e përkohshme.
Arta Marku u shpall fituese me 69 vota pro, 2 kundër dhe 2 abstenim.
Ajo u betua si Kryeprokurore në kushte esktreme me dorën mbi Kushtetutë. “Betohem”, ka thënë Marku, mes tymit dhe flakadanëve.
Zgjedhja e Kryeprokurores së re u bë përmes një seance të tensionuar, ku nuk munguan as tymueset dhe fladanët nga deputetët e opozitës. Flamur Noka, Ervin Salianji dhe Endri Hasa kanë qenë deputetët e PD-së, të cilët kanë hedhur tymuese e ngjyrues në drejtim të kryeministrit Edi Rama dhe kryetarit të Kuvendit, Gramoz Ruçi.
Arta Marku është 41 vjeçe, e lindur në Pukë dhe me një përvojë 15-vjeçare në Prokurorinë e Shkodrës.
Kush është Arta Marku?
Ajo u diplomua në shkollën e Magjistraturës në vitin 2001. Një vit më pas u emërua në Prokurorinë e Shkodrës ku mbajti detyra të ndryshme, që nga shefe e njësisë task-forcë në 2006 e deri zëvendës drejtuese deri në 2016.
Marku e ka nisur karrierën e saj në kohën kur kryeprokuror në Shkodër ishte Ulsi Manja, ndërkohë që prej 16 vitesh dosjet e hetuara prej saj dhe të përfaqësuara në Gjykatë kanë qenë fare të pakta.
Një ndër to është dosja ndaj pedagogut Fran Qafa, i cili më pas mori pafajësinë në Gjykatë.
Në fakt për numrin e pakët të dosjeve të hetuara, zonja Marku u pyet edhe nga anëtarët e Komisionit të Ligjeve, të cilëve iu përgjigj se ajo kishte firmosur mjaft dosje të hetuara prej kolegëve dhe të përcjella në Gjykatë.
