Vetëm dy ditë më parë, iconstyle.al raportoi situatën e të dëmtuarve nga tërmeti i 26 nëntorit të strehuar në Marikaj, pranë qendrës “Shpresa” për fëmijët jetimë, të themeluar nga fondacioni amerikan “Shpresë për botën”.
Drejtoresha e qendrës, Ledina Rabdishta, pas tërmetit hapi dyert e qendrës së saj duke u ofruar strehim të gjithë fëmijëve të familjeve përreth të prekur nga tërmeti, por edhe prindërve të tyre të vendosur në çadra pranë godinës së fondacionit.
Në një intervistë për iconstyle.al, ajo u shpreh se po mundohej të ndihmonte të gjithë komunitetin, por rezervat e saj po shkonin drejt fundit duke qenë se nevojat ishin të mëdha.
Megjithatë, thirrja e saj nuk ra në vesh të shurdhër. Vetëm një ditë më pas, në Marikaj mbërritën furgonët me ndihma të mundësuara nga “Eco Market” që kanë siguruar produkte ushqimore jo vetëm për fëmijët, por edhe për banorët përreth që janë prekur nga tërmeti.
Gjithashtu, në qendrën “Shpresa” ka mbërritur dhe kompania e vezëve “Aiba” që ka dhuruar produktet e saj për të lehtësuar situatën e të strehuarve përsa i përket ushqimit.
Në një komunikim me iconstyle.al ditën e sotme, drejtoresha e qendrës, Ledina Rabdishta, shprehu të gjitha falenderimet e saj për donatorët, duke shtuar se dalëngadalë situata po shkonte drejt normalizimit.
