Vaksina anti-Covid nga Pfizer/BioNTech kanë mbërritur edhe në Greqi. Vaksinimet e para janë bërë ditën e sotme dhe e para që e mori dozën ishte një infermiere në Athinë, Efstathia Kampisiouli, e cila shërben në spitalin Evangelismos.
Ministri i Shëndetësisë, Vassilis Kikilias ka shkuar vetë në spital sot për të ndjekur nga afër evenimentin që shihet si një shpëtim nga pandemia. Më pas vaksinën do e bëjnë edhe Presidentja e vendit, Catherine Sakellaropulou dhe kryeministri grek, Kyriakos Mitsotakis në spitalin “Attikon”. 9 750 dozat e para të vaksinave do të ruhen në zona të veçanta, që plotësojnë specifikimet për ruajtjen e produkteve farmaceutike. Vaksina e prodhuar nga Pfizer/BioNTech duhet të ruhet në temperatura shumë të ulëta -70/-80 gradë celsius.
Përveç personave të përmendur më sipër, punonjësit e vijës së parë të kujdesit shëndetësor dhe personat më vulnerabël do të jenë të parët që do të vaksinohen. Autoritetet thanë se deri në fund të dhjetorit, Greqia pritet të marrë rreth 83,850 vaksina, teksa deri në fund të marsit përllogariten mbi 1 milion e 200 vaksina. Gjatë të hënës vaksinat do të dërgohen në spitalet e Larisës, Selanikut, Janinës dhe Patras dhe inokulimi do të fillojë për stafin mjekësor më 29 dhjetor.
Në të gjitha vendet e BE, në mënyrë uniforme ka nisur vaksinimi masiv fillimisht për personelin shëndetësor dhe personat me detyra të rëndësishme kryesisht qeveritare.
