Pas helmimit, zyrtarët e KQZ-së kanë rinisur procesin e shqyrtimit dhe vlerësimit të fletëve të votimit të nisura nga Serbia.
Këtë herë ata kanë marrë masa të rrepta sigurie dhe siç duket edhe nga fotot numëruesit janë veshur me maska, veshje të veçanta, e doreza.
Kjo veshje i izolon plotësisht ata në mënyrë që të mos kenë asnjë kontakt me zarfët.
“Ky vlerësim është i domosdoshëm pasi ka për qëllim të identifikojë një fletëvotim me personin që e ka dërguar pakon. Pra, që ta dijmë nëse fletëvotimi i dërguar është nga një votues i regjistruar suksesshëm si votues jashtë vendit. Pasi të bëhet ky vlerësim, do ta dijmë saktë se sa është numri i fletëvotimeve të aprovuara apo të refuzuara. Vetëm fletëvotimet e aprovuara numërohen”, tha për Ekspress zëdhënësi i KQZ-së, Valmir Elezi.
Disa ditë më parë numëruesit e votave përfunduan në spital, pasi ata shfaqën shenja alergjie në fytyrë dhe duar. Ende nuk dihet se çfarë e shkaktoi një alergji të tillë.
