Ka nisur mësimi online edhe për studentët, bën me dijë ministrja e Arsimit, Besa Shahini në një njoftim për media.
“Universiteti ‘Aleksandër Moisiu’, Durrës ka filluar mësimin online duke përdorur platformat falas si Google Classrom, Zoom apo Eztalks”, njofton në rrjetin e saj social Facebook Ministrja Shahini.
“30 module janë tashmë online dhe 2,000 studentët e parë kanë filluar mësimin”, nënvizon Shahini.
Të tre këto platforma janë të aksesueshme lehtësisht nga kompjuteri, por edhe nga pajisjet smartphone Android dhe Apple.
Rektori i Universitetit të Tiranës, Mynyr Koni ka firmosur sot dy urdhra, i pari ka të bëjë me ndërprerjen e procesit mësimor deri në 3 prill, ndërsa i dyti lidhet me mësimin online.
Rektori u kërkon njësive kryesore që të testojnë platformat dhe deri më 27 mars të depozitojnë edhe mënyrën me të cilën do të zhvillojnë mësimin.
