Aktorja fituese e çmimit Oscar, Nicole Kidman, është sërish në qendër të vëmendjes mediatike, këtë herë për jetën e saj personale. Sipas raportimeve të mediave ndërkombëtare, biznesmeni amerikan Paul Salem ka shprehur interes romantik për aktoren pas ndarjes së saj nga këngëtari country Keith Urban.
Burime për TMZ bëjnë të ditur se Paul Salem ua ka bërë të qartë njerëzve të afërt se është i interesuar të dalë me Kidman. Dyshja njihen përmes miqve të përbashkët dhe janë takuar dy herë në publik.
Megjithatë, sipas burimeve, ata nuk kanë kaluar kohë së bashku në mënyrë private dhe aktualisht nuk janë në një lidhje. Aktorja thuhet se mbetet beqare dhe nuk po frekuenton askënd.
Kush është Paul Salem
Paul Salem është një figurë e njohur në botën e biznesit amerikan. Ai është kryetar i bordit të MGM Resorts International, kompani ku u bashkua në vitin 2018 dhe mori drejtimin në vitin 2020. Për gati 30 vite ai ka qenë drejtues i lartë në Providence Equity, një firmë investimesh me vlerë rreth 50 miliardë dollarë. Salem është gjithashtu bashkëpronar i ekipit të bejsbollit Worcester Red Sox.
Ndërkohë, sipas dokumenteve gjyqësore të siguruara nga Daily Mail, Nicole Kidman dhe Keith Urban finalizuan divorcin muajin e kaluar. Marrëveshja parashikon që të dy palët të heqin dorë nga çdo kërkesë për mbështetje financiare për fëmijët dhe të mbulojnë individualisht shpenzimet e tyre.
Pasuritë janë ndarë në mënyrë që secila palë të mbajë atë që zotëron aktualisht, ndërsa ish-çifti ka hequr dorë përfundimisht nga çdo kërkesë për pension ushqimor ndaj njëri-tjetrit. Kostot ligjore do të ndahen në mënyrë të barabartë dhe procesi është mbyllur me mirëkuptim, pa një betejë të zgjatur gjyqësore.
