Miriam Cani është rikthyer në një intervistë pas kaq shumë kohësh dhe i ka thënë të gjitha.
Për herë të parë ajo ka pozuar për kopertinën e revistës “Class” së bashku me vajzën e saj Ameli, që është bërë një zonjushë kaq e bukur.
Miriam ka folur rreth projekteve të reja, fëmijërisë, familjes e mjaft detajeve të tjera interesante.
Kështu, këngëtarja ka folur rreth mëmësisë dhe të qenurit nënë e dy fëmijëve. Ajo e ka përshkruar këtë me fjalët më të bukura, duke thënë se asgjë tjetër nuk ka më shumë vlerë.
Është bekim. Lumturi. Frymëzim. Nuk besoj se ka arritje më të madhe për një njeri sesa të krijojë një familje të shëndetshme në çdo aspekt. Shpeshherë, kur i shoh të dy fëmijët bashkë, nuk më besohet që i kam lindur unë. Falënderoj Zotin në çdo moment. Sidomos në kohët që po jetojmë, gjithçka për çfarë i lutem Zotit është shëndeti i tyre. Asgjë tjetër nuk ka vlerë më shumë. Ndihem e bekuar me familjen që kam!
Sakaq, ajo ka folur edhe për Duamin e vogël, që shumë shpejt mbush 1 vjeç. Miriami ka treguar se si dashuria për Duamin e ka ndryshuar tërësisht, ndonëse shprehet se pas lindjes së Amelit nuk e mendonte se mund të dënte një fëmijë tjetër aq shumë.
Duami është një dashuri. Pasi linda Amelinë, nuk e imagjinoja dot kurrë që do mund të doja një fëmijë tjetër po aq shumë sa doja Amelinë. Por zemra e nënës qenka një univers më vete. Dashuri që nuk përshkruhet dot me fjalë. Dashuria për Duamin, duke qenë se është djalë, është disi ndryshe nga ajo që ndjej për Amelinë, por njëlloj e fuqishme dhe drithëruese. Duami është princi i mamit!
Ajo ka treguar se Ameli e do shumë vëllain e vogël, por sigurisht nuk mungojnë as xhelozitë, që kapërcehen shpejt. E duke qenë se akoma nuk ka kaluar një vit që kur ajo është bërë nënë, planet për një fëmijë të tretë nuk janë të afërta.
Në mes të angazhimeve profesionale që ka Miriam ka treguar se përpiqet të jetë një nënë sa më shumë prezente dhe një grua me disa dimensione, pasi mendon se duhet gjetur gjithmonë një balancë midis familjes dhe punës, fëmijëve, bashkëshortit dhe karrierës.
Sigurisht, nuk kishte si të mos pytej edhe për Albanin dhe marrëdhënien e tyre. Cili është sekreti i jetëgjatësisë së raportit të Miriam dhe Albanit dhe a janë kaq perfekt sa duken? Ja si është përgjigjur ajo:
Kemi ngulur themele shumë të forta bashkë në këto 13 vite. Kemi kaluar sfida të mëdha bashkë dhe këto na kanë lidhur shumë me njëri-tjetrin. Ardhja e dy fëmijëve në jetën tonë na ka ridimensionuar, lidhur dhe frymëzuar për të qenë akoma më të fokusuar tek e ardhmja dhe lumturia brenda familjes sonë. Jemi një çift i zakonshëm si gjithë të tjerët. Perfeksioni nuk ekziston. Qeshim, qajmë, duhemi dhe grindemi si çdo çift tjetër. Dhe është mirë kështu, sepse këto momente e mbajnë një lidhje gjallë.
Çifti ka në plan që të vijë me një tjetër bashkëpunim, por nuk ka ende detaje se kur dhe çfarë kënge do jetë. Ndonëse momentalisht është shkëputur nga ekrani, Miriam thotë se projektet muzikore do vijojnë dhe janë gati. E pyetur se për çfarë zihet më shpesh me Albanin, Miriam është përgjigjur “Për fëmijët!”
Kohët e fundit ata u janë përkushtuar bizneseve të tyre dhe kjo është arsyeja përse nuk kanë qenë shumë aktivë në muzikë.
Miriam ka ardhur me një linjë veshjesh për fëmijë, të cilët janë muza e frymëzimit të saj. Një frymëzim që ka jetuar tek ajo që nga fëmijëria, por që u zgjua kur u bë nënë. Një projekt për të cilin janë dashur muaj të tërë punë e pandalshme, por i ndërtuar me shumë dashuri dhe përkushtim.
