Maqedonia e Veriut ka marrë masat për të zhvilluar mësimin online nga shtatori për nxënësit e shkollave fillore dhe të mesme.
Në periudhë pandemie, kur situata pritet të përshkallëzohet në rajon me viruset stinore dhe koronavirusin nëpërkëmbë, vendimi për mësimin online duket si një opsion efikas i marrë në këtë periudhë për të mos rrezikuar rritjen e numrit të infeksioneve.
Por ky vendim ka nxitur reagime të shumta, në veçanti të nxënësve të shkollave të mesme atje. Drejtuesit e Unionit të Nxënësve të Shkollave të Mesme thonë se nuk janë konsultuar për këtë vendim dhe kërkojnë mësim të kombinuar, nga distanca dhe me prani fizike të nxënësve në shkolla.
Ministria e Arsimit dhe Ministria e Shëndetësisë kanë vendosur që mësim me prani fizike të ketë vetëm për nxënësit nga klasa e parë deri në të tretën, por edhe kjo formë mund të mos realizohet nëse prindërit nuk e japin pëlqimin.
Shoqatat e arsimtarëve dhe ekspertët kërkojnë nga institucionet që nxënësve t’u mundësohet të shkuarja në shkollë me grupe, orë të shkurtuara, me mbajtje të distancës dhe respektim të masave higjienike, por a ndihet gati Maqedonia të dërgojë nxënësit në shkolla në kushte pandemie?
Ku çalon mësimi online?
Së pari, mangësi në njohuri dixhitale!
Sipas të dhënave të Byrosë së Statistikave të Bashkimit Evropian, Eurostat, 64 për qind e të rinjve nga mosha 16 deri në 24 vjeç në Maqedoninë e Veriut, disponojnë aftësi dixhitale nga 80 % që është shifra në vendet e BE-së.
Pandemia ka nxjerrë në pah rëndësinë e përdorimit të teknologjisë, sa i përket procesit edukativo-arsimor, por mangësitë që janë vënë re si në Maqedoni ashtu edhe në Shqipëri gjatë karantinës, e bëjnë mësimin online më pak të pëlqyer. Shumë prindër janë ankuar se nuk kanë aftësi teknologjike mjaftueshëm për t’u ardhur në ndihmë fëmijëve.
“Nga hulumtimet dhe anketat që janë bërë, mësimi online nga marsi deri në qershor ishte i dështuar. Nuk jemi të përgatitur si shtet për këtë lloj mësimdhënie dhe nuk do të lejojmë që gabimi të përsëritet”, thuhet në reagimin e Unionit të Nxënësve të Shkollave të Mesme.
Së dyti, mësimi online nuk është i arritshëm në të gjithë vendin
Mangësi të natyrave teknike janë regjistruar në Maqedoni dhe Shqipëri, kryesisht në zonat rurale, por edhe tek familje të shumta në nevojë të cilat nuk kanë akses në internet, apo që nuk kanë mjetet e nevojshme si celularë dhe kompjuter.
Pikërisht, të zhgënjyer nga mungesa e internetit falas, programeve që mundësojnë gjithëpërfshirjen, angazhimin e mësuesve dhe leksioneve aspak aktive, shumë nxënës, prindër e mësues në Shqipëri, zgjodhën alternativën e hapjes së shkollave në shtator, edhe përkundrejt rrezikut për përhapjen e infeksioneve (shiko këtu).
Propozimi: Smartphone dhe internet falas për nxënësit në Shqipëri
Teksa Shqipëria është në një udhëkryq pas vendimit për hapjen e shkollave në kulmin e pandemisë, ish-ministri i Shëndetësisë, aktualisht deputet i PS-së në Kuvend Ilir Beqja kërkon që të hapet një debat për arsimin e dekadës së ardhshme. Ai propozoi që nxënësve t’u krijohet mundësia që t’u jepen falas tabletat apo smartphone-t si dhe interneti cilësor që në shtëpi të zhvillojnë aftësitë në shkencë e teknologji.
Në të kundërt, thotë ai, qoftë politika e ofrimit të librave falas, qoftë mësimi i programimit që në klasë të parë fillore do të jenë të cunguara.
Ky propozim është në thelb mjaft me vlerë për nxënësit në Shqipëri, përsa kohë që nuk i shërben asnjë interesi vetjak apo përfitimit të ndonjë tenderi përmes kësaj kauze të ndjeshme.
Prej vitesh, nxënësit, mësuesit dhe prindërit në Shqipëri, janë gënjyer me pretendimet se teknologjia do të ishte pjesë e mësimdhënies duke harxhuar miliona euro për klasat inteligjente dhe një duzinë burimesh financiare për Reformën Kurrikulare. Shqiptarët janë të lodhur me premtime parazgjedhore dhe kërkojnë zgjidhje konkrete.
Situata është e tillë që na bën të mendojmë se edhe nëse në Shqipëri do të ishte zgjedhur mësimi online si në Maqedoninë e veriut, sërish do të kishte protesta dhe pakënaqësi, por të paktën do të shërbenin për perfeksionimin e shkollave dixhitale.
Sot që flasim, pavarësisht vendimit për hapjen e shkollave, Ministria e Arsimit nuk e ka hequr mundësinë e mësimit online, të cilin e ka në plan në rast mbyllje shkollash nga infeksionet.
Por askush nuk po bën asgjë për ta bërë funksional këtë mësim online, nisur nga eksperienca zhgënjyese e karantinës.
/Iconstyle.al
