Ndarja nga jeta e aktores meksikane Edith Gonzalez tronditi edhe fansat e saj këtu në Shqipëri, siç u vu re nga komentet e shumta që shprehnin keqardhje në profilin në Instagram të Iconstyle.
Me rolin e saj protagonist në telenovelën “Salome”, Gonzalez u bë ndër fytyrat më të dashura për publikun shqiptar që asokohe, mezi ç’priste të vinte prapë pasditja për të ndjekur si rridhnin ngjarjet e telenovelës së tyre të preferuar meksikane.
Silvia Navarro
Paloma rebele që nuk hiqte dorë u shndërrua në një fenomen të vërtetë në Shqipëri.
Aq të famshëm u bënë çifti Paloma- Diego, personazhe kryesore të “Kur ti të jesh e imja”, saqë asokohe gazetarja Rudina Demneri u mbiquajt “Paloma” dhe madje, “Top Albania Radio” publikoi asokohe edhe një album me këngët më të pëlyera të transmetuara gjatë serialit.
Barbara Mori
A ka nevojë për fjalë Rubi?
E para telenovelë me një protagoniste negative, qëlloi drejt e në shenjë me aktoren Barbara Mori, brunen me sytë e gjelbër që i magjepsi të gjithë.
Thalia
Këngëtare, aktore dhe një prej fytyrave më simpatike të telenovelave, Thalia u shndërrua në një idhull për shumë vajza përmes telenovelës “Rosalinda”.
Elizabeth Gutierrez
Protagonistja e serialit “Analia”, ku personazhi kryesor kthehej në një person krejt tjetër përmes ndërhyrjeve estetike (asokohe dukej e pabesueshme diçka e tillë) u bë një prej më të pëlqyerave në Shqipëri.
Elizabeth është gjithashtu bashkëshortja e aktorit William Levy, një idhull i vërtetë për adoleshentet e brezit 2005- 2010.
Anahi
Aktorja që luante rolin e Mia-s në versionin meksikan të “Rebelde” ishte në kopertinën e revistave shqiptare për adoleshentë, kur seriali me dy sezone transmetohej në “Vizion Plus”.
Maite Perroni
E njohëm tek seriali për adoleshentë “Rebelde”, por më pas Maite Perroni na rrëmbeu zemrat si protagoniste jo e një, por disa serialeve me historinë e përhershme: e varfra e pafajshme dashurohet me pasanikun, si përshembull: “Kujdes nga Ëngjëlli” apo “Triumfi i dashurisë (Gjejeni pak kush triumfoi në fund këtu)”
Angelique Boyer
Edhe Angelique Boyer një prej aktoreve të “Rebelde”, u kthye në një fenomen të vërtetë në 2010-ën me serialin “Teresa” ku luante rolin e një vajze të bukur, ambicioze dhe shumë manipuluese, që bënte gjithçka për pushtet dhe para.
Më pas atë e pamë edhe tek seriali “Lo que la vida me robo”.
Eiza Gonzalez
Eiza Gonzalez, protagoniste e “Dashuri të vërteta”, ku luan rolin e një vajze të llastuar që dashurohet me truprojën (i cili është shumë hot, sigurisht) ishte ndoshta e fundit aktore meksikane që shenjoi publikun shqiptar në 2012-ën.
Pas kësaj, telenovelat meksikane u zëvendësuan nga serialet turke dhe nuk u porositën më nga televizionet tona.
Kurse Eiza sot ka shkuar në Hollywood dhe këtë vit e pamë tek filmi “Alita: Battle Angel”.
