Prodhuesit e bukës, pastiçeritë dhe byrektoret kanë paralajmëruar një rritje të çmimit të produkteve të tyre, pasi nuk përfitojnë nga çmimi i reduktuar i energjisë elektrike.
Disa prej furrave të bukës që furnizohen në tensionin e ulët kanë një çmim energjie të reduktuar prej 7,6 lekësh për kilovat/orë, i vendosur ky nga Enti Rregullator i Energjisë. Por, sipas shoqatës së prodhuesve të bukës, OSHEE nuk i fut të gjitha furrat në këtë kategori.
Për shkak të përdorimit të pajisjeve të veçanta frigoriferike për disa shërbime të tjera, disa prodhues buke janë penalizuar nga tarifa e reduktuar e energjisë elektrike prej 7.6 lekë/kw. Kjo ka bërë që ata të paralajmërojnë rritje të çmimit.
“Duke u rritur energjia elektrike do të rriten edhe çmimet e produkteve që ne shesim”, shprehet pronarja e një furre buke për Top Channel.
Byrektoret, furrat e tregtimit të bukës dhe ëmbëlsirave kërkojnë subvencionim nga shteti për çmimin e energjisë elektrike, në të kundërt paralajmërojnë rritje të çmimit të produkteve të tyre.
Shoqata i është drejtuar edhe ministrit të Energjisë, Damian Gjiknuri ku i propozohet që për furrat e tregtimit të bukës, ëmbëlsirave dhe byrektoreve, të aplikohet një tarifë prej 8,2 lekë/kw.
/Top Channel
