Ditën e sotme është mbajtur në qytetin e Shkodrës funerali i ikonës së kinematografisë shqiptare, Rikard Ljarja.
Aktori u nda nga jeta mbrëmjen e kaluar, pas një beteje të gjatë me një sëmundje të rëndë.
Familjarët kanë çuar në vend amanetin e 77-vjeçarit, i cili para se të ndërronte jetë kishte kërkuar të varrosej në vendlindjen e tij, në Shkodër.
Funerali i aktorit ka mbledhur njerëz ditën e sotme, të cilët e kanë përcjellë Ljarjan me duartrokitje për në banesën e fundit.
Mirëpo, gjatë transmetimit të funeralit në ekran, vumë re veprime shqetësuese nga personat e pranishëm, që rrisin rrezikshmërinë e infektimit nga Covid-19.
Personat në funeral nuk u kujdesën aq sa duhet për të respektuar distancën sociale, madje dikush përqafoi dhe puthi aktorin Robert Ndrenika pa marrë parasysh emergjencën Covid-19.
Jo vetëm kaq, gazetarja e”News24″ i afrohet Roza dhe Dhimitër Anagnostit pa maskë dhe doreza për të realizuar një intervisë me ta.
Ajo afrohet shumë pranë për t’i bërë pyetjet çiftit, duke folur thuajse “fytyrë më fytyrë”, diçka që kategorikisht nuk duhet të ndodhë gjatë kësaj situate.
Disa prej të pranishmëve mbanin maska në fytyrat e tyre, ndërsa të tjerë ishin pa asnjë masë mbrojtëse dhe qëndronin pranë njëri-tjetrit duke biseduar apo vajtuar aktorin.
Deri tani, funeralet kanë qenë përhapës të rrezikshëm dhe të menjëhershëm të virusit Covid-19, ndaj shpresojmë që funerali i aktorit Ljarja të mos sjellë pasojat e funeraleve të tjerë që janë bërë në kohë pandemie.
/Iconstyle.al
