Disa ditë më parë, Elvana Gjata dhe Yll Limani publikuan bashkëpunimin e parë mes tyre, ashtu siç ishte paralajmëruar prej kohësh. Në fakt ata i surprizuan të gjithë pasi publikuan jo një, por dy projekte muzikore, që menjëherë janë kthyer në këngët e preferuara për publikun.
“E di” dhe “Marre” titullohen këngët e reja të artistëve, që u vlerësuan jo vetëm për ritmin e bukur, por dhe videoklipet shoqëruese.
Së fundmi, Ylli Limani ka qenë i ftuar në programin “Edicioni Veror” ku ka dhënë më shumë detaje përsa i përket karrierës së tij. Në një intervistë për gazetaren Irini Meçe, ai zbuloi si lindi bashkëpunimi me Elvana Gjatën.
“Bashkëpunimi me Elvanën lindi në mënyrë shumë spontane. Ka kohë që me Elvanën përpiqemi të bëjmë diçka të bukur. Biseduam, ia prezantova demot, i pëlqyen dhe punuam bashkë. Publikut i pëlqyen, është këngë që të dy e duam shumë,” u shpreh këngëtari.
Ndër të tjera, ai dha lajme të mira për të gjithë fansat e tij pasi u shpreh se kjo verë do të sjellë edhe projekte të tjera të tij dhe po ashtu tha se po punon për albumin e ri.
“Ndoshta do të ketë. Jemi në finalizim të disa këngëve. Pak a shumë ca kanë ndihmuar edhe këto koncertet e verës është me pa ku jemi me demo që i kemi punuar gjatë pandemisë, sepse ndërron tendenca. Do të ketë shumë projekte të reja. Albumi ka dy vjet që ka filluar të punohet,” u shpreh Ylli.
