Standardet e dyfishta vijojnë në vendin tonë kaq të çuditshëm. Si pasojë e pandemisë Covid-19, asnjë grumbullim nuk lejohet, me justifikimin për të ndaluar përhapjen e koronavirusit.
Problemi qëndron në faktin se ky rregull aplikohet vetëm për personat e thjeshtë, dhe shoqërinë që kërkon të protestojë për padrejtësitë që ndodhin.
Nga ana tjetër, kur ka interesa pushteti, grumbullimet jo vetëm që lejohen, por edhe organizohen sipas qejfit. Dhe, sot e kemi fjalën as më shumë e as më pak, por për qendrën e Tiranës.
Fiks në Sheshin Skënderbej, ka nisur puna për montimin e shtëpizave të drurit, që çdo fundvit është njohur si ‘Fshati i Festave’.
Aty janë vendosur biznese të ndryshme me shërbime për qytetarët e Tiranës, për dhe ka qëndruar i hapur gjatë dhjetorit, në pritje të vitit të ri kalendarik.
Ditën e djeshme, aty ka nisur puna për vendosjen e këtyre shtëpizave, dhe për punë ditësh do të hapen për të afruar klientë, për të qëndruar i hapur deri në ditët e para të janarit.
Kryetari i Bashkisë, Erion Veliaj, duket se nuk e ka fare parasysh koronavirusin, dhe nuk e vret shumë mendjen për të, për sa kohë merr qiranë e këtyre bizneseve që do kenë shtëpinë e tyre në mes të sheshit.
Veliaj i bën edhe karshillëk Ramës, që lodhet nga mëngjesi në darkë duke bërtitur të mbajmë maskën, por i besuari i tij për Tiranën, organizon grumbullime njerëzish mu në mes të Tiranës, pa e menduar dy herë se jetojmë në kohë pandemie.
Në një kohë kur kancelarja e Gjermanisë, Angela Merkel u bën thirrje gjithë gjermanëve të shmangin daljet dhe darkat në restorante jashtë shtëpisë nëse nuk është e nevojshme, Erion Veliaj i organizon mu në mes të Tiranës.
Një shkelje e hapur e këtyre rregullave dhe një dashakeqësi, duke menduar për përfitimet që mund të vijnë, dhe duke lënë pas dore shëndetin e njerëzve…
Foto e shkrepur dje pas nisjes së punimeve në Sheshin Skënderbej, datë 21 tetor 2020
/GazetaReforma.com/
