Kryeministri Edi Rama ka njoftuar se nga nesër do të mbyllen të gjithë Call Center-at dhe kompanitë fasone, në kuadër të masave të ndërmarra për të frenuar përhapjen e Koronavirusit në vend.
Në një njoftim për shtypin nga Facebook-u, kreu i qeverisë u shpreh se kompanitë janë të detyruara që kur të rifillojë aktiviteti, të siguojnë distancat teknike të sigurisë.
“Sot kemi ndërmarrë një sërë inspektimesh në kompanitë fasone dhe Call Center, që do jenë të mbyllura nesër dhe deri në fund të këtij afati, por Kompanitë janë të detyruara të zbatojnë të gjitha elementet dhe të respektojnë të gjitha distancat teknike të sigurisë. Kur të rifillojë aktiviteti dhe konstatohet se nuk janë kryer të gjitha detyrimet për mbrojtjen e punonjësit, jo vetëm që do mbyllen por do marrin përsipër vetë kompanitë çdo kosto, se në këtë rast është neglizhenca e tyre, dhe jo për një forcë maxhore të paktën në këtë fazë të planit për zmbrapsjen e këtij armiku që na kërcënon”.
Gjithashtu, nga nesër, do të ndalohet lëvizja me makina private, urbane dhe autobuza në 8 qytete të Shqipërisë. Masat e reja të vendosura nga qeveria, lejojnë të qarkullojnë vetëm mjetet shtetërore, policore, autoambulancat, makinat e bizneseve dhe farmacive, përfshirë ato që transportojnë mallra, makinat e mediave, e të gjithë ata që punojnë në administratën shtetërore.
Numri i të prekurve nga Koronavirusi në vendin tonë ka arritur në 23 në vetëm pak ditë nga e hëna kur u identifikuan dy rastet te para.
