Pak kohë më parë, portali “gazetareforma.com” hodhi dritë mbi skandalin e mishit të infektuar me salmonelë dhe E.Coli të bllokuar në portin e Durrësit më 8 gusht të vititi 2019 (lexo këtu). Bëhet fjalë për një ngarkesë prej 25 ton mish derri, e porositur nga kompania EHW që sipas analizave të kryera nga Autoriteti Kombëtar i Ushqimit, rezultoi me ngarkesë bakteriale mbi normat e lejuara e që sipas procedurave do të duhej të rikthehej në vendin e origjinës. Në diskutim ka qenë dhe origjina e ngarkesës, e identifikuar fillimisht si Brazil (vend me probleme të shumta përsa i përket cilësisë së mishit), e më pas si Qipro.
Megjithatë, një gjë e tillë nuk ndodhi. “iconstyle.al” është kontaktuar së fundi nga kompania EHW, përfaqësuesit e së cilës na kanë vënë në dispozicion dokumentat që ata zotërojnë lidhur me këtë çështje. Sipas këtyre dokumentave, në muajin nëntor të 2019-ës, sasia e mishit e bllokuar ka dalë në treg për konsumatorët. Zhbllokimi i mishit është bërë pasi analizat e kryera nga Instituti për Sigurinë Ushqimore dhe Veterinarinë, e kanë klasifikuar këtë mish si të përshtatshëm për konsum.
Megjithatë, siç shihet qartë në raportin e ISUV që vetë EHW na ka vënë në dispozicion, analizat janë kryer vetëm për salmonelë dhe jo për E.Coli. “iconstyle.al” ka komunikuar ka ISUV lidhur me këtë çështje, por drejtuesi i institucionit, z. Armand Reveli ka refuzuar të na japë akses në të dhënat në fjalë për shkak se ky është një informacion konfidencial. Për të hedhur më shumë dritë mbi këtë çështje, “iconstyle.al” ka komunikuar me AKU dhe si pëgjigje, ka marrw një email të thjeshtë, pra jo një raport zyrtar, ku na konfirmojnë se mishi ka rezultuar pa mbingarkesë bakteriale. Duke qenë ky një informacion tërësisht i pamjaftueshëm, “iconstyle.al” ka rikontaktuar AKU dhe është ende në pritje të një përgjigjeje. Por çfarë po ndodh në prapaskenat e kësaj çështjeje të koklavitur?
Teksa institucionet vijojnë të heshtin, EHW ka versionin e vet të ngjarjeve. Sipas përfaqësuesëve të kompanisë, e gjithë kjo situatë është stisur enkas për të dëmtuar imazhin e kompanisë. Ata pretendojnë se mostrat e marra për analizë, janë marrë një një tjetër kompani që në të njëjtën ditë, ka sjellë nga Brazili mish të infektuar e që supozohet që pas bllokimit, është rikthyer në vendin e origjinës (histori kjo gjithashtu e bërë publike nga mediat në gusht 2019). Në listën e dokumentave që ata në kanë vënë në dispozicion, gjithashtu paraqiten dhe pretendimet për falsifikimin e firmës së përfaqësuesit të kompanisë që realizon dorëzimin e mostrave tek AKU. Gjendur në këtë situatë, EHW ka depozituar një kallëzim penal pranë Prokurorisë së Tiranës për ish-kreun e AKU, z. Agron Hetoja, ish-inspektorin e AKU, z. Rakip Kokomani dhe ish-drejtoreshën e Drejtorisë së Vlerësimit të Riskut dhe Komunikimit, znj. Esmeralda Gorovelli.
Por situata në fjalë, qartazi ngre pikëpyetje të shumta mbi aktivitetin e të dyja palëve. “iconstyle.al” gjithashtu i është drejtuar me një shkresë zyrtare Prokurorisë së Tiranës për të mësuar më shumë mbi hetimin rreth kësaj çështjeje dhe mbetemi ende në pritje të reagimit të institucioneve publike.
