Elon Musk dhe Donald Trump dikur dukeshin si një dyshe e paprekshme. Por kohët kanë ndryshuar dhe tani përplasjet mes tyre po ndikojnë direkt në çmimin e aksioneve të Teslës.
Gjithçka nisi pas kritikave të hapura të Musk ndaj një projektligji të propozuar nga Trump, që ai e quajti “i çmendur” përsa i përket shpenzimeve. Reagimi i ish-presidentit amerikan nuk vonoi: kërcënime për të rishikuar subvencionet e qeverisë ndaj SpaceX dhe Starlink, si dhe deklarata se do të “shqyrtonte deportimin” e Elon Musk.
Ky shkëmbim i fortë ka shkaktuar panik në treg dhe si pasojë, aksionet e Teslës ranë me mbi 5%, duke i shkaktuar miliarderit humbje të mëdha financiare në një kohë kur kompania nuk po kalon periudhën më të mirë.
Tensioni i hapur vjen pasi Musk është larguar zyrtarisht nga roli i tij në administratën Trump, ku kishte qenë pjesë e Departamentit të Efikasitetit të Qeverisë (DOGE).
Ndërkohë, në sallonet e Teslës po shtohen protestat dhe pakënaqësitë për drejtimin e kompanisë. Me përplasjet që tashmë po bëhen publike dhe ndikimin e drejtpërdrejtë në treg, Musk duket më i ekspozuar se kurrë më parë, jo ndaj hapësirës, por ndaj politikës amerikane.
