Dilema se ku të kaloja pushimet nuk ishte aq e lehtë për t’u zgjidhur këtë verë. Duke parë çmimet e Dhërmiut, ku një omëletë kushtonte 800 lekë apo mungesën e shërbimit, këtë vit doja që Jugu mos të ishte destinacioni im. Fatmirësisht ishim në një mendje bashkë me dy miket, për të parë ofertat e guidave jashtë Shqipërisë.
Dhe mes datave që na përkonin me 5 ditë pushim, vendosëm të zgjidhnim opsionin për në Budva. Nuk ishte hera jonë e parë që vizitonim plazhin e Malit të Zi, por ishte një eksperiencë më e gjatë, prej së cilës mësuam disa gjëra që duhet t’i kemi parasysh kur zgjedhim paketat me guida.
1.Shikoni hotelin
“Nuk do jetoni aty!”. Këtë shprehje mund t’jua thonë shpesh, por dijeni se është e drejta e gjithkujt që të marrë atë për të cilën ka paguar. Ne vendosëm që të shikonim hotelin në “booking.com”, pasi imazhet që ofrohen aty janë gjithmonë më reale.
Por gabuam diku! Te vendndodhja e tij. Pavarësisht informacionit që jep agjencia, e cila nuk shprehet asnjëherë 100% e vërtetë në mënyrë që të mos humbasë klientë, duhet të bëni një kërkim për vendndodhjen e tij.
Më saktësisht duhet të dini sesa larg është hoteli nga qyteti dhe sa larg është nga plazhi. Pavarësisht se çfarë na thotë kompania ku bëjmë paketën, është detyra jonë që të marrim privatisht këtë informacion.
2.Po guida kush është?
Bashkë me paketën ne paguajmë edhe guidën, personi i cili duhet të dijë çdo informacion për vendin ku do të udhëtojmë dhe do të na udhëheqë në vendet më interesante. Në rastin tonë nuk ndodhi kështu! Në fund të pushimeve tona, veçse shijuam detin dhe diellin, nuk mund të tregonim ndonjë kuriozitet për vendin, veç faktit se, “femrat në Bar vishnin vetëm atlete”. Interesante?!
Çfarë mund të bëni në të tilla raste? Njoftoni agjencinë ndërsa ndodheni atje për t’i komunikuar çdo pakënaqësi, në mënyrë që ata të marrin masa.
3.Është plazh privat apo publik?
Ashtu si në plazhet e Jugut edhe në Budva plazhet ishin të ndara në publike dhe private. Në këto të fundit e kishim të ndaluara të hynim me çdolloj gjëje veç ujit.
Një rast i tillë ishte edhe plazhi i Plloçës, i cili ishte i mrekullueshëm dhe ku mund të shijosh festën në “shkuma-party” për orë me radhë.
4.Këpucët e plazhit
Gabimi më i madh, për të cilën u penduam sapo arritëm në plazhet e Budvës, ishte që nuk kishim marrë këpucët e plazhit. Plazhet janë me shkëmbinj dhe gurë, si rasti i Ishullit Hawaii, nëse nuk i harroni këmbët do t’ju falënderojnë.
5.Lekët shtesë që duhet të paguani
Çdo paketë ka të shënuar se çfarë mbulon pagesa që bëjmë, nga udhëtimi, te hoteli apo vaktet. Ndaj kur shkoni për të bërë pagesën pyetni për paratë që do të shpenzoni dhe nuk janë të përfshira në paketë, si udhëtimi me anije nga Budva në Ishullin Hawaii.
6.Jeta e natës dhe meshkujt/femrat
Nëse ka diçka për të cilën mbahet Budva është jeta e natës. Dhe për më tepër nëse je beqar/e atëherë bëhu gati për të festuar dhe për të njohur njerëz të rinj.
