“Nëse i torturon mjaftueshëm të dhënat, ato do të rrëfehen”, kështu nis postimi në Facebook i epidemiologut Ilir Alimehmeti, i cili teksa zbulon se qarku me numrin më të lartë të rasteve me Covid-19 në Shqipëri është Gjirokastra, ndalet te një tjetër çështje me rëndësi: testimet!
“Sllogani “Test, Test, Test” i OBSH-së tashmë na del dhe në ëndërr, por rëndësinë e vërtetë ndoshta e kemi anashkaluar”, shprehet specialisti shqiptar.
Nisur nga analiza në fjalë, e kryer përmes të dhënave që vetë Ministria e Shëndetësisë deklaron zyrtarisht përmes komunikimit ditor, vërehet se përqindjet më të ulëta të testimeve pozitive gjenden pikërisht në qarqet, ku është testuar më shumë për çdo 100.000 banorë. Kështu Tirana është momentalisht, qarku me përqindjen më të ulët.
A është vërtet rritja e testimeve, faktor kyç në luftën kundër Covid-it?
Nëse do të qëndrojmë te shifrat në fjalë, vëreni se si numri i rasteve dhe i vdekjeve është më i ulët pikërisht në qarqet ku kryhen më shumë testime. E njëjta gjë vërehet me humbjet e jetës, ku për çdo 1.000 testime, Durrësi ka 8.0 humbje jete, e ndërsa Tirana vetëm 2.4 humbje jete
Sipas Alimehmetit, shifrat janë kokëforta dhe nuk të lënë të hamendësosh.
“Prandaj shtimi i testimeve të shpejta është element kyç dhe duhet të liberalizohen dhe të përdoren masivisht. Duke testuar më shumë duket sikur shifrat shkojnë më keq në afatshkurtër, por në fakt thjesht na vënë në dukje atë çka ndodh realisht me apo pa testime, por duke na mundësuar veprimin, i cili në mangësi testimesh është detyrimisht më pak i informuar dhe më i pasaktë”, sqaron ai.
Duhet thënë se që në nisje të përballjes së vendit tonë me pandeminë Covid-19, specialisti në fjalë ka lobuar vazhdimisht për rritje të testimeve, si një mënyrë efikase kjo në trajtimin dhe menaxhimin e situatës së pazakontë.
Lufta pozitë-opozitë
Përgjatë muajve të fundit, çështja e rritjes së numrit të testimeve në Shqipëri mund të cilësohet lehtësisht si një mollë sherri mes pozitës dhe opozitës. Partia Demokratike ka cekur në mënyrë sistematike nevojën e më shumë testeve, çka nuk ka vonuar kundërpërgjigjen e qeverisë.
Në një kohë kur këtë temë, opinioni publik e lidhi drejtpërsëdrejti me qeverinë, më 7 prill, kryeministri Rama do të shkruante kështu në Twitter:
“A mundet dikush t’ia thotë PD-së se qeveria nuk vendos sa teste bëhen a nuk bëhen?! Aq më pak qeveria mund të marrë mendjen e PD-së për këtë punë! Strategjinë e testeve e bën Komiteti Teknik i Ekspertëve dhe PIKË! Qeveria zbaton ato që vendos Komiteti dhe PIKË! PD ia fut kot. PIKË!”- duke lënë të kuptohej qartësisht se vendimi në fjalë ishte i ekspertëve.
Çfarë thonë specialistët?
Një gjë që ne e dimë me siguri është se çdokush mund ta ndihmojë vendin e tij që të kontrollojë pandeminë COVID-19, duke nisur nga mbajtja e një maske te larja e duarve apo ruajtja e distancës fizike dhe shmangia e tubimeve të mëdha në ambiente të mbyllura. Por specialistët ndërkombëtarë shprehen se testimi i sa më shumë njerëzve është gjithashtu efikas. Po kështu, vetë Organizata Botërore e Shëndetësisë ngulmon në rëndësinë e shtimit të testimeve.
Testi shpëton jetë
Një test pozitiv e shtyn individin të vetëkarantinohet, duke zvogëluar shanset që të infektojë të tjerët. Po kështu, personi i infektuar arrin të marrë sa më shpejt që është e mundur një mjekim ndihmues, duke zvogëluar ashpërsinë e sëmundjes dhe rrezikun e vdekjes.
