Nertil Qato është heroi shqiptar, që shpëtoi dy jetë në një banesë në Livorno të Italisë, mbrëmjen e 28 qershorit . 31-vjeçari nga Berati, ka dëgjuar thirrjet për ndihmë të një vajzë 14-vjeçare dhe nënës së saj, pasi kishin mbetur të bllokuara në banesën e tyre, të përfshirë nga flakët. Qato është zgjuar menjëherë nga gjumi dhe nuk ka nguruar t’i shpëtojë.
“Dëgjova një shpërthim dhe dola jashtë. Pashë banesën që ishte shembur pjesërisht, flakë dhe tym të zi. Dëgjova një thirrje për ndihmë dhe nxitova. Vendosa shkallën dhe u ngjita në katin e dytë. Aty nuk dukej gjë për shkak të tymit të zi dhe flakëve. Por dëgjova zërin e një vajze, e mora në krahë dhe e zbrita poshtë. Më pas mora edhe nënën e saj.”- ka treguar Qato për “Gazzetta di Livorno”.
Kryetari i Bashkisë së Livornos Filippo Nogarin ka vlerësuar gjestin e shqiptarit, madje i ka dorëzuar edhe një çmim special. Gjithashtu, ai i premtoi Nertil Qatos se do t’i përshpejtohen procedurat e lejes së qëndrimit si dhe do të pajiset me shtetësi italiane.
“Është njeri punëtor dhe ende nuk ka nënshtetësinë sepse ligjet parashikojnë se duhet të ketë të paktën 10 vite leje qëndrimi. Më kujtohet veprimi i presidenti francez që vendoi t’i japë shtetësinë një qytetari nga Mali, pasi shpëtoi një fëmijë. Do doja dhe unë të bëja diçka të ngjashme”- ka thënë Kryetari i Bashkisë.
