Vëllai i mjekut Pëllumb Pipero, Edmondi ishte i ftuar sot në emisionin “Shqipëria Live”, në Top Channel, përmes një lidhjeje me Skype për të folur për familjen e tij.
Edmond Pipero tregoi një tjetër aspekt të doktorit, atë më personal. Ai shprehet se janë 5 vëllezër dhe 2 motra dhe pas vdekjes së nënës dhe babait, mjeku Pipero ka bërë shumë për ta.
Vëllai i mjekut të njohur Infeksionist që është në frontin e luftës kundër COVID-19, shprehet se ai gjithmonë ka këmbëngulur që vëllezërit dhe motrat e tij të ndiqnin shkollën dhe të studionin.
“Pëllumbi është më i madhi i fëmijëve, ne jemi 5 vëllezër dhe 2 motra. Para disa vitesh na vdiq babai, nënën e kemi humbur shumë herët dhe Pëllumbi është për ne nënë, baba, vëlla. Është ashtu siç e shikoni në televizor. E duam shumë, ka bërë shumë, është zemërgjerë. Të gjithë fëmijët tanë janë me universitet. Ai gjithmonë i thoshte: shikoni shkollën, bëni shkollën”, tregoi Edmondi, vëllai i vogël i Pëllumb Piperos, sipas Tirana Post.
Edmondi jeton në Gjermani ku është edhe sipërmarrës. Ndërkohë, vëllai i tij Pëllumb Pipero është bërë një personazh i famshëm në Shqipëri me situatën e koronavirusit me ekspertizën që jep në këtë fushë.
