Një dokumentar i ri pretendon se Nënë Tereza kishte një anë shumë më të errët. Dokumentari me tre pjesë në Sky i titulluar “Nënë Tereza: Për dashurinë e Zotit” pretendon se fituesja e çmimit Nobel për Paqen nuk ishte ashtu si dukej.
Në fillimet e saj Nënë Tereza, një murgeshë katolike me origjinë shqiptare shkoi në një mision për të ndihmuar ata që ishin prekur rëndë nga uria e Bengalit e vitit 1943, raporton Daily Mail.
“Unë do të largohesha nga manastiri dhe të ndihmoja të varfërit. Të mos e bëja do të ishte thyerje e besimit”-shkroi ajo më vonë. Pasi u transferua në Kalkuta ajo mori lejen nga kisha për të krijuar “Misionarët e Bamirësisë”, një kongregacion fetar.
Kongregacioni drejtonte kuzhina, ambulanca, klinika të lëvizshme, programe këshillimi për fëmijë dhe familje dhe më në fund filloi hapjen e jetimoreve dhe shkollave.
Pasi një dokumentar i BBC-së i vitit 1969 për punën e saj u shfaq në botë, Nënë Tereza u bë një personazh i famshëm shumë shpejt por pavarësisht se u nderua me Çmimin Nobel për Paqen në vitin 1979, ajo kishte shumë persona që dyshonin në punën e saj.
Kur prifti Donald McGuire u dyshua për abuzim ndaj të miturve, ajo i shkroi një letër autoriteteve duke theksuar besimin e saj tek ai. Kjo e lejoi McGuire të abuzonte me qindra fëmijë për një dekadë tjetër, përpara se të largohej përfundimisht. Gjithashtu nnë kulmin e saj, organizata e saj po merrte miliona dollarë donacione megjithatë shumica e tyre po transferoheshin në bankën e Vatikanit.
Mjeku britanik Jack Preger punoi me organizatën e saj dhe u trondit nga ajo që pa.
“Murgeshat nuk po jepnin kujdesin e duhur, gjilpërat përdoreshin vazhdimisht të pasterilizuara. Një gruaje me djegie iu refuzuan ilaçet kundër dhimbjeve”-shprehet ai në dokumentar.
Ata kishin para për të drejtuar një spital të mirë për njerëzit e varfër, por nuk e bënë kurrë. Ata thonin se do të luteshin për zbutjen e dhimbjes por pa ofruar trajtim. Për të mos përmendur që vuajtja ishte një pjesë integrale e punës së saj dhe murgeshat u udhëzuan të rrihnin veten dhe të mbanin zinxhirë teli me thumba. Në përmbledhjen zyrtare të dokumentit thuhet: “Duke gërmuar në jetën e një prej njerëzve më të njohur në historinë bashkëkohore, Nënë Terezës, duke zbuluar të vërtetën e jashtëzakonshme pas figurës enigmatike, të diskutueshme dhe komplekse”.
