Një muaj pas humbjes tragjike të 14-vjeçarit Martin Cani, aktivistët e grupimit “Prindërit për Arsim Cilësor” dhe dhjetra qytetarë zhvilluan një marshim proteste nga shkolla “Fan Noli” drejt Ministrisë së Arsimit. Ata kërkuan me forcë drejtësi për Martinin dhe mbajtjen përgjegjëse të institucioneve që, sipas tyre, kanë dështuar të mbrojnë jetën e të miturve.
Me pankartën kryesore “Institucionet e Papërgjegjshme Vrasin” dhe thirrjet për dorëheqje, protestuesit akuzuan institucionet arsimore për neglizhencë dhe policinë për moszbardhjen e plotë të ngjarjes.
Prindërit e Martinit, u bashkuan në protestë, duke shprehur dhimbjen e tyre të thellë dhe duke kërkuar dorëheqjen e zyrtarëve të arsimit dhe të sigurisë që, sipas tyre, nuk kanë përmbushur detyrimet e tyre.
“Ministrja as nuk më ngushëlloi. Qeshte në parlament ndërsa ne qanim për djalin tonë. Dua dorëheqjen e saj dhe të gjithë atyre që ishin përgjegjës, nga shkolla deri te Ministria,” tha nëna e Martinit, me zërin që i dridhej nga emocioni.
Ajo theksoi se tragjedia e djalit të saj duhet të shërbejë si mësim për të parandaluar raste të ngjashme në të ardhmen: “U bënë 30 ditë pa Martinin. Ju duhet të luftoni që të mbroni fëmijët tuaj.”
Prindërit e Martinit i drejtuan një letër ambasadës amerikane në Tiranë, duke kërkuar mbështetje për monitorimin e veprimeve të institucioneve shtetërore.
Martin Cani u vra në nëntor gjatë një konflikti me bashkëmoshatarin e tij jashtë shkollës “Fan Noli” në Tiranë, ngjarje që tronditi mbarë opinionin publik. Ndërsa autori i vrasjes u arrestua, qytetarët vazhdojnë të kërkojnë përgjegjësi dhe masa konkrete për sigurinë e nxënësve.
