Personat të cilët do të vaksinohen në Shqipëri kundër koronavirusit pritet të pajisen me një “pasaportë udhëtimi” për jashtë vendit.
Ishte vetë ministrja e Shëndetësisë, Ogerta Manastirliu ajo që bëri të ditur lajmin në fjalë. E ftuar në emisionin “Opinion” mbrëmjen e djeshme, ajo sqaroi se dokumenti do të lëshohet nga portali qeveritar e-Albania.
Por çfarë është shqetësuese në këtë mes?
Një raport i botuar nga Universiteti Exeter thotë se, teksa një pasaportë vaksine mund të lejojë menaxhimin afatgjatë të COVID-19, ajo gjithashtu mund të shkaktojë shkelje të mbrojtjes së të dhënave dhe të lejojë që vendet të përcaktojnë liritë e individëve bazuar në të dhënat e tyre mjekësore.
Disa ekspertë paralajmërojnë për rreziqet e privatësisë dhe potencialin për diskriminim dhe abuzim.
Në Evropë, Komisionit të BE-së i kërkohet të marrë në konsideratë prezantimin e një programi për pasaportat e vaksinimit, sa u takon shteteve të zonës Shengen. Kjo do të sillte nga një anë nxitje të madhe në industrinë e udhëtimeve. Në disa vende, të tilla si Greqia, vizitorët e vaksinuar tashmë po lejohen të hyjnë pa kufizime. Por a do të thotë kjo se ata që nuk mund ose nuk duan të vaksinohen do të jenë gjithmonë subjekt i kufizimeve të udhëtimit?
Privilegje për të vaksinuarit
“Diçka e tillë do barazohej pastaj me një detyrim për vaksinim”, shprehet për gazetën “Bild”, politikani kristiansocial Horst Seehofer.
Ndërkohë ekspertë të tjerë argumentojnë se për momentin, kur nuk ka vaksinë për të gjithë njerëzit, nuk duhet të lejohet një gjë e tillë.
A ekziston mundësia që ky dokument të falsifikohet?
Sipas Manastirliut ky dokument nuk do të jetë i falsifikueshëm, pasi çdo qytetar do të ketë kodin unik të skanuar.
“Po, ne e kemi planifikuar dhe e kemi gati që nëpërmjet e-Albania të merret formati i vaksinimit. Pra që ke kryer vaksinimin në dozën e pare dhe në dozën e dytë”, tha ministrja.
