Në seancën e sotme parlamentare u votua projekt-ligji për shembjen dhe rindërtimin e Teatrit Kombëtar, por artistët kundra këtij vendimi janë mbledhur të protestojnë para godinës së Teatrit kundër shembjes së tij.
Një nga aktorët kundër këtij vendimi është edhe aktori i njohur Gent Zenelaj , i cili në mënyrë ironike i është drejtuar me disa fjalë drejtorit të Teatrit Ekperimental “Kujtim Spahivogli” Kiço Londo duke i kërkuar të mos qante sepse tani e tutje artistet do të bëjnë teatër në rrugë.
“Po u them atyre që do të vijë dita që ta bëni gjumin e qetë, më kanë akuzuar mua se jam partiak se votojmë atë parti që duam. Ju keni partinë e lekut, zoti i juaj është leku, bëni be për lekun. Më lejoni t’u quaj qytetar të lirë të këtij vendi, unë sot përulem para jush. Faleminderit që zgjodhët që të jeni të lirë. Kiço mos qaj, do bëjmë teatër më të mirë i dashur, mos qaj, ej mos qani. Do bëjmë teatër të ri. Do bëjmë teatër në rrugë”- u shpreh Zenelaj.
