Teksa na ndajnë vetëm pak muaj nga zgjedhjet, kryeministri Edi Rama ka dhënë një lajm të madh për punën e lokaleve në ambientet e tyre të brendshme që në kushte pandemie, nuk është lejuar që nga 18 maji e deri më sot.
Nga Vlora, ku inspektoi bizneset atje, kryeministri tha se ministria e Shëndetësisë do të lejojë që lokalet të hapen edhe brenda dhe jo vetëm jashtë.
“Sot do të dalë njoftimi i ministrisë së Shëndetësisë për hapjen brenda të lokaleve, se është problem tani që fillon koha më e ftohtë, por duke respektuar masat, mos e merreni me shaka Covid-in” tha Rama.
Detajet për lejimin e frekuentimit brenda të ambienteve të lokaleve do të jepen nga ministria e Shëndetësisë, por ajo që na intereson të dimë është nëse është koha e duhur për të hapur ambientet e brendshme të lokaleve.
Ruajtja e distancës dhe pajisja me maska kanë qenë dy nga rregullat e ndërmarra në kuadër të masave anti Covid në ambiente të mbyllura dhe të frekuentuara, por nuk janë respektuar në masë nga qytetarët shqiptarë të cilët ende nuk e kanë kuptuar rrezikun e virusit.
Nga ana tjetër baret, lokalet dhe restorantet janë sektori më pak i mbështetur gjatë pandemisë të cilët janë penalizuar nga kriza ekonomike dhe mungesa e mbështetjes nga qeveria, dhe zgjerimi i aktivitetit të tyre në thelb duket pozitiv.
Por ky vendim i marrë në prag të zgjedhjeve dhe në mesin e një pandemie, kërkon një ndërgjegjësim të madh dhe një studim të mirëfilltë nga Ministria e Shëndetësisë, ndërkohë që para na pret një sezon gripi dhe virusesh.
Rama tha gjithashtu se nuk do të ketë inspektime në këto biznese, por vetëm mbikëqyrje të punës në të zezë, duke respektuar këtu punën e punonjësve dhe marrjen e pagave.
“Heqja e TVSH ishte gjëja më e mirë për biznesin. E nisëm deri në 80 milionë që bëmë një zbritje të fortë gjysmë për gjysmë të taksës që ishte më parë dhe pastaj e shtrimë në 120 milionë. Tani e çuam në 140 milion . Deri tek 100 pa taksa, pa TVSH, tek 140 milionë pa taksa por me TVSH. Gjeja më e rëndësishme është se do shpëtoni nga çdo kontroll inspektimi dhe faturë, por duke monitoruar respektimin për punonjësit sigurimet shëndetësore e shoqërore” tha Rama.
