Nis sot për të dytën ditë radhazi protesta e studentëve, të cilët me thirrjet “Ne nuk jemi bankomat” kërkojnë përgjysmim të tarifave dhe heqjen e tarifave shtesë. Por ndryshe nga dita e djeshme, protesta është përhapur edhe në Universitetin e Durrësit, Korçës dhe Elbasanit.
Nga Fakulteti i Mjekësisë, Shkencat e Natyrës, Inxhinieria e Ndërtimi, Fakulteti Fizikës, Juriduku, Ekonomiku dhe Gjuhët e Huaja, janë grumbulluar sot pranë godinave ku ata bëjnë mësim për të marshuar më pas drejt Ministrisë së Arsimit.
Këshillat Studentore të Universiteteve Publike i janë drejtuar me një kërkesë Ministrisë së Arsimit dhe Sportit, ku paraqesin 4 kushtet e tyre, si përgjysmim të tarifave dhe heqjen e tarifave shtesë.
Studentët kanë bojkotuar mësimin, ndërsa marshimi nis në orën 09:30 për t’u grumbulluar më pas në orën 10:00 para Ministrisë së Arsimit në kryeqytet.
Ministrja e Arsimit, Lindita Nikolla pasi diskutoi me drejtuesit e Universiteteve u shpreh se, vendimi për të cilët protestojnë studentët nuk ka hyrë ende në fuqi, ndërsa përgjegjësinë për tarifat ia kaloi Universiteteve.
