Një ngjarje e pazakontë ka ndodhur mesditën e sotme në qytetin e Pogradecit, ku disa emigrantë të paligjshëm kanë shpërthyer derën e furgonit të bllokuar nga forcat e policisë për t’u larguar më pas drejt rrugëve të qytetit.
Sipas informacioneve të marra mësohet se 15 prej tyre janë kapur nga forcat e policisë, kurse të tjerët janë të shpërdarë nëpër qytet mes tyre edhe drejtuesin e mjetit i cili po kryente transportimin e tyre. Dyshohet se emigrantët e paligjshëm kanë hyrë nga Greqia në Shqipëri dhe kanë tentuar që të futen në brendësi të territorit shqiptar me një furgon mallrash, por u pikasën nga policia, e cila tentoi që t’i ndalonte.
Siç duket qartë edhe nga pamjet, bëhet fjalë për rreth 20 emigrantë të paligjshëm që fillimisht janë bllokuar brenda një furgoni në rrugët e Pogradecit, por ndërkohë që efektivët prisnin përforcime, ata kanë shkelmuar derën nga brenda duke u larguar me vrap për t’i shpëtuar forcave të policisë.
Emigrantët ilegalë që e përdorin Shqipërinë si një vend transit për të kaluar në vende të BE janë të shumtë. E ndërkohë kujtojmë se kohët e fundit janë kapur shumë emigrantë të paligjshëm të cilën transportoheshin nga vende të tjera në Shqipëri duke synuar kështu destinacione të reja. Pak ditë më parë efektivët e Policisë së Korçës kanë spikatur një grup me emigrantë të paligjshëm ku kanë rënë në pranga disa prej tyre dhe të tjerë janë shpallur në kërkim.
/gazetareforma.com
