Ky ishte një vit kyç për Kinën për realizimin e objektivit të zhdukjes së varfërisë ekstreme në të gjithë vendin dhe pavarësisht se ndodhemi në kohë pandemie dhe u godit e para nga Covid-19, ia doli.
Nëntë fshatrat e fundit të zhytur në varfëri në provincën Guizhou të Kinës jugperëndimore dolën zyrtarisht nga lista e varfërisë, deklaroi të hënën qeveria vendore e provincës.
Në fund të vitit 2019, 52 fshatrat në veriperëndim, juperëndim dhe jug të Kinës ishin ende në listën e vendeve të varfëra: 9 në provincën Yunnan, 10 në Rajonin Autonom të Xinjiang-Ujgurit, 1 në Rajonin Autonom Ningxia-Hui, 7 në provincën Sichuan, 8 në Rajonin Autonom Guangxi- Zhuang, 8 në provincën Gansu dhe 9 në provincën Guizhou.
Shteti kinez ka nxjerrë nga varfëria mbi 10 milionë njerëz çdo vit, prej vitit 2013. Në pesë vitet e fundit kanë dalë nga varfëria mbi 55 milionë banorë.
Presidenti kinez Xi Jinping deklaroi fitoren në një rrugë tetë-vjeçare për të çrrënjosur varfërinë ekstreme në vendin më të populluar në botë.
“Ne kemi arritur në kohën e duhur qëllimin për zbutjen e varfërisë të epokës së re”, tha Xi në një takim të Enjten të Komitetit të Përhershëm të Byrosë Politike me shtatë anëtarë, organi suprem i vendimmarrjes së Kinës, sipas Agjencisë zyrtare të Lajmeve Xinhua. Ai shtoi se të ardhurat e gati 100 milion njerëzve ishin zhvendosur mbi vijën zyrtare të varfërisë së Kinës – të përcaktuar si ata që fitojnë më pak se 11 juanë (1.68 dollarë) në ditë – gjatë asaj periudhe.
Pasi mori drejtimin e Partisë Komuniste tetë vjet më parë, Xi bëri përpjekjen për të eleminuar varfërinë ekstreme deri në vitin 2020 një nga qëllimet e tij kryesore. Partia e përkufizon atë si një hap drejt arritjes së asaj që ajo e quan një shoqëri “mesatarisht të prosperuar”, një pjesë kryesore e lëvizjeve të saj për të përmirësuar standardet e jetesës dhe për të mbështetur pretendimin e saj për legjitimitetin politik.
Fushata kundër varfërisë ka përfshirë një mobilizim masiv të burimeve shtetërore, me dhjetëra miliona njerëz të zhvendosur nga fshatrat e thella në shtëpitë e sapo-ndërtuara afër qendrave urbane. Banorët e moshuar dhe me aftësi të kufizuara rurale kanë marrë para dhe qeveria ka nisur skema për të gjetur punë për ata që ishin të papunë ose të varur nga bujqësia ekzistenciale.
Në 5 vitet e ardhme, Kina do të shtojë përpjekjet për më shumë arritje në zhdukjen e varfërisë dhe nxitjen e plotë të strategjisë së lulëzimit të fshatrave, sipas objektivave të zhvillimit ekonomiko-shoqëror të propozuar nga Komiteti Qendror i Partisë Komuniste të Kinës për periudhën e Planit të 14-të 5-vjeçar (2021-2025).
