Tirana do të ketë kufizime në furnizimin me ujë këtë fundjavë.
Institucioni Ujësjellës Kanalizime në Tiranë ka lajmëruar mesditën e djeshme në rrjetin social “Facebook” se nisur që nga dita e shtunë do të fillojnë punimet për lidhjen e tubacionit të ri 10 km i cili do të shtojë sasinë e ujit në Bovillë.
Por kjo do u kushtojë shumë shtrenjtë konsumatorëve, pasi gjithë fundjavën do të jenë pa ujë si në “epokën e gurit”.
Sikur të mos mjaftonte me kaq, kufizimet kanë nisur që sot në disa zona, ku njerëzit janë gjetur të papërgatitur nga mungesa e ujit, pasi nuk janë njoftuar për një gjë të tillë.
Në rrugën “Sami Frashëri” në kryeqytet, në disa apartamente dhe biznese të zonës, ndërprerja e furnizimit me ujë ka nisur mbrëmjen e ditës së enjte dhe ka vazhduar deri në mesditën e sotme.
Megjithëse këto ndryshime për shtimin e tubacioneve janë të vlefshme për komunitetin, ato nuk duhen bërë në një moment të tillë.
Kjo nisur nga situata e rrezikshme në të cilën ndodhemi. Këto ditë më shumë se kurrë të gjithë qytetarët kanë nevojë për të ruajtur higjenën.
Kjo për vetë faktin, pasi është e rrezikshme që në mes të periudhës së pandemisë Covid-19 të mos kujdesemi dot për higjenën tonë personale dhe të familjes. Mbase mund të ishte gjetur një rrugë e mesme për të mos e ndërprerë furnizmin me ujë për dy ditë rresht, ose edhe alternativa për shtyrjen e punimeve për lidhjen e tubacionit të ri 10 km, në një moment të dytë më të përshtatshëm për të gjithë qytetarët.
Nga ana tjetër është Ministria e Shëndetësisë ajo që u bën thirrje të përditshme qytetarëve, në daljet e saj para mediave për të ruajtur higjenën.
E si mund ta ruash higjenën kur nuk ke ujë në shtëpi apo në ambientet e punës? Në komunikimin e përditshëm, Ministria e Shëndetësisë raportoi për 15 raste të reja të infektuarish brenda 24 orëve në vendin tonë dhe Tirana vazhdon të mbetet ende “vatra e nxehtë” e rasteve të infektuara me koronavirus.
Në një komunikim me gazetareforma.com, zëdhënësja e UKT u shpreh se kufizimi në furnizimin me ujë do të vijojë në institucionet më të rëndësishme siç janë spitalet, burgjet e maternitetet. Ndërsa për ndërprerjet e së enjtes mbrëma dhe të premtes, ajo u shpreh se do duhej të kryheshin verifikime në terren pasi nuk ka pasur njoftim për kufizime.
Njoftimi i bërë nga UKT në rrjetin social Facebook:
“Ju kujtojmë se ditën e shtunë fillojnë punimet për lidhjen e tubacionit të ri 10 km, i cili do shtojë sasinë e në Bovillë. Rriten ndjeshëm oraret e furnizimit
Kërkojmë mirëkuptimin e banorëve për kufizimet gjatë kësaj fundjave dhe marrjen e masave për të mirë-administruar depozitat personale apo të godinës ku banojnë”.
Të shumtë kanë qenë edhe komentuesit që kanë drejtuar pyetje se në cilat zona do të ketë ndërprerje totale të ujit dhe përgjigjja e UKT është se ndërprerja do të ndodhë në të gjithë Tiranën.
https://www.facebook.com/ujesjellesitirane.al/posts/3221492904551334
