Sa më shumë kalon kohë, aq më tepër pandemia merr trajtat e një krize ekonomike, tashmë kur duket se kriza shëndetësore është kaluar.
Mirëpo, sikundër e dimë të gjithë kriza ekonomike nuk do kalojë aq kollaj dhe pasojat pritet të ndjehen për një kohë të gjatë.
Një nga pasojat e pandemisë Covid-19 që ka goditur më së shumti sektorin e turizmit është ulja e shitje blerjeve, ndër bizneset e para që u mbyllën në muajin mars.
Sipas të dhënave të Institutit të Statistikave në tremujorin e –parë, shitjet neto në sektorin e Hoteleve kanë rënë me 7.9%.
Kjo pasi ata u mbyllën menjëherë pas rasteve të para me Covid-19 dhe u hapën vetëm në muajin maj.
Por, për shkak të mbylljes së kufijve edhe rezervimet apo aktivitetet që mund të zhvilloheshin në ambientet e tyre, u anuluan ose u shtynë për në një moment tjetër.
Më pas janë agjencitë turistike, që praktikisht ende janë pjesërisht të mbyllura pasi kufijtë ajror nuk janë hapur të gjithë dhe mungojnë shitjet e biletave apo rezervimeve të ndryshme.
Në tremujorin e parë të këtij viti shitjet neto të agjencive turistike kanë rënë me 7.3% krahasuar me 2019, e pasuar nga sektori i bareve dhe restoranteve, ku shitjet kanë rënë 4.8%.
Një problem tjetër, që agjencitë turistike e kanë vënë në dukje prej kohësh eshtë edhe fakti se rreth 70% e rezervime të bëra para pandemise, tashmë janë anuluar.
Po ashtu, sipas statistikave të INSTAT rezulton se ka më pak të punësuar në bare e restorante për periudhën janar-mars duke pësuar rënie 21,7 %, krahasuar me vitin 2019.
Panorama në vendin tonë kët verë duket shumë e trishtë, teksa shumë qytete nga pandemia duket se e kanë humbur shkëlqimin e tyre.
Turizmi ishte një sektor që po rritej me shpejtësi si rrjedhojë e futjes së Shqipërisë në listat e agjencive më të mëdha turistike, duke rritur kërkesën për paketa nga nordikët, polakët, çekët, izraelitët etj.
Kjo kishte nxitur interesin e biznesit vendas për të investuar në shtimin e kapaciteteve akomoduese përmes hoteleve të reja.
Sipas INSTAT, lejet e dhëna për hotele në 2019-n, i korrespondonin një vlere investimi prej më shumë se 100 milionë eurosh, shumëfishim në raport me vitin e mëparshëm, duke tërhequr dhe financimet e bankave.
Pritshmëritë nuk janë optimiste as për tremujorin e tretë, që përkon me periudhën e verës.
Operatorët turistikë pohojnë se shumë prenotime janë anuluar, teksa situata mbetet e paqartë me shtimin sërish të rasteve me COVID-19, pas lehtësimit të masave.
Ndonëse, turizmi shihet si motori i vetëm për rindezjen e ekonomisë, mirëpo në vendin tonë qeveria nuk ka dhënë një mbështetje të posaçme për aktorët e këtij tregu.
2020 shihej si një vit me shumë rëndësi për turizmin, që do ta çonte në një shkallë më të lartë, pasi një vit më parë ndërtimet e reja, përshtatja e paketave turistike dhe vlerësimi për Shqipërinë, e kthyen atë në destinacion për 6.4 milionë banorë, por pandemia ka vënë në pikëpyetje edhe mbijetesën.
Disa ditë më parë Shoqatat Turistike në vend janë mbledhur dhe kanë nënshkruar një peticion, ku i kërkojnë qeverisë gjashtë kërkesa për kapërcimin e krizës së krijuar nga Covid-19, për turizmin shqiptar.
6 kërkesat drejtuar qeverisë:
1-Çlirimin e bizneseve të turizmit nga të gjitha detyrimet fiskale deri në 31 dhjetor 2020 (përfshirë taksat lokale dhe taksën e pronës)
2-Subvencionimin e pagave edhe për punonjësit e bizneseve të mëdha turistike të larguar nga puna pas datës 10 prill 2020
3-Ngrirjen e kësteve dhe krijimi i kushteve për kreditë të buta për sektorin e akomodimit.
-Propozojmë të shtyhen afatet e pagesave të kredive të paktën deri në 30 mars 2021, qeveria duhet të mbulojë me grante nga BE interesin e stokut të kredive në këtë industri.
-Të rritet kapitali i garancisë sovrane dhe tu krijohet mundësi kreditimi hoteleve nga kjo garanci deri 20% të të ardhurave të realizuara në vitin 2019 me interes zero dhe gres periode deri në 2 vjet në mënyrë që të shpëtojë falimenti.
4-Mbështetje nga qeveria me pagesa të sigurimeve shoqërore të hoteleve që kanë profil sezonal dhe kryesisht ato që nuk kanë biznes të dytë gjatë periudhës së dimirt.
5-Zbritja e TVSH nga 20% në 10 % edhe për hallkat e tjera të turizmit që nuk janë përfshirë në reduktimin e TVSH.
Stimuli i turizmit të brendshëm nëpërmjet subvencioneve
6-Bonus për turistët vendas që do bëjnë pushime në Shqipëri.
