Operatorët e telefonicë celulare shpesherë kanë shtrenjtuar çmimet e paketave, duke ngjallur goxha pakënaqësi në radhët e qytetarëve. “iconstyle.al” prej kohësh po ndjek me shqetësim këtë çështje, që ka goxha ndikim tek qytetarët shqiptarë, të cilët kanë rënë ‘pre’ e abuzimeve të njëpasnjëshme, një pjesë të të cilave i kemi trajtuar e një pjesë tjetër do i ndjekim në vijim.
Në gjithë këtë vorbull shkeljesh dhe abuzimesh, e gjithë përgjegjësia, përveçse te vetë kompanitë ka rënë tek Autoritet i Konkurrrencës dhe Autoriteti i Komunikimeve Elektronike dhe Postare që në vazhdimësi kanë qëndruar dhe qëndrojnë në heshtje, përballë kësaj çështjeje, por jo vetëm.
E gjithë kjo papërgjegjshmëri arriti kulmin në gusht. Kur pakënaqësitë ndaj kompanive celulare vijnë në rritje dhe ndërhyrja nga AKEP dhe AK është shumë e nevojshme, kjo e fundit mori një vendim aspak normal dhe të papranueshëm, duke mbyllur në heshtje hetimin e hapur për oligopolin e shkurtit të organizuar nga kompanitë celulare. (KLIKO)
Vodafone rrit çmimet papritur!
Javët e fundit është vënë re se Vodafone ka rritur sërish çmimet e paketave. Abonentëve nuk u ka shpëtuar kjo gjë dhe menjëherë kanë nisur të ankohen në rrjetet sociale.
Mirëpo, kompania në fjalë është justifikuar duke thënë se çmimet janë rritur sepse janë shtuar edhe GB, siç mund ta shihni në foton e mëposhtme.
Për ta ilustruar atë që shkruajtëm më sipër mjafton të shohim paketën “Combo” që para një muaji kushtonte 1200 lekë, ndërsa brenda pak kohësh është bërë 1500 lekë.
Pra, është rritur me 25% ndërkohë që ofrohet shtesë 1GB dhe 1000 SMS me Vodafone.
Por, teksa Vodafone rrit çmimet duke u mburrur me Internetin që ofron, ç’ndodh në realitet?
Shumë prej nesh kemi marrë një mesazh për paketën në të cilën jemi abonuar dhe brenda pak orësh ka ardhur një mesazh i dytë që tregon se 80 % e internetit ka përfunduar.
Ja një rast:
Madje, madje çudia shkon deri aty sa 6 GB të konsumohen vetë për 30 minuta.
Nga denoncimet e ardhura në “iconstyle.al”, një qytetar shprehet:
Ti blen internet dhe të mbarohet sa hap e mbyll sytë, pa e marrë vesh fare. Dhe përgjigja që të japin kur ankohesh është se i ka fajet modeli i telefonit, apo që i ke konsumuar në kohë rekord. Si mund të konsumohen psh 2GB internet për 2 orë?
Nga një vështrim i shpejtë i paketave të Internetit nga Vodafone vëmë re se ka një abuzim të paparë me çmimet kundrejt të cilave ofrohen MB/GB qesharake, si për shembull me 500 lekë të reja merr vetëm 50 MB Internet (50 minuta kombëtare + 50 SMS kombëtare), që marrin fund në jo më shumë se 60 minuta.
Po ashtu, një tjetër paketë qesharake, është ajo mujore që kushton 1000 lekë dhe ofron 200MB Internet (3G/4G) dhe 100 MB Internet 4G (300 minuta kombëtare +300 SMS kombëtare).
Pakënaqësia në masë
Rreth dy muaj më parë iconstyle.al zhvilloi një sondazh për të pyetur abontentët e Vodafone në Shqipëri në lidhje me shpenzimet e tyre mujore dhe pakënaqësitë që kanë.
Dhe rezultati lë për të dëshiruar, gati 91% e pjesëmarrësve ishin të pakënaqur me çmimet e paketave dhe mendonin se paguanin shumë!
68% e pjesëmarrësve në sondazh shpenzonin 15 deri në 20 mijë lekë të vjetër në muaj për paketat dhe janë më tepër përdorures të internetit sesa të minutave apo të sms-ve.
Ndryshimi i tarifave pa njoftim, pa kaluar ende 1 muaj që kur AKEP përcaktoi mënyrën si do veprohet!
Autoriteti i Komunikimeve Elektronike dhe Postare (AKEP) njoftoi më 5 tetor hap pas hapi si pjesë e rregullores për mbrojtjen e konsumatorit, duke u ndalur edhe tek ndryshimi i tarifave. Në draftin e nxjerrë për konsultim thuhet se sipërmarrësit janë të detyruar të paraqesin në AKEP informacionin mbi tarifat e shërbimeve, si dhe çdo ndryshim të tyre me arsyetimet mbështetëse, jo më vonë se 15 ditë para hyrjes në fuqi të tarifave ose ndryshimeve të tyre.
“Ky informacion duhet të dërgohet në rrugë elektronike dhe/ose shkresore. Forma e dërgimit të të dhënave në rrugë elektronike do të jetë e disponueshme edhe në faqen e internetit të AKEP. AKEP-i publikon vlerësimin e përgjithshëm krahasues të tarifave aktuale sipas përcaktimeve të nenit 12 te kësaj rregulloreje” thuhet në dokumentin e AKEP.
Po ashtu, në njoftim thuhet se sipërmarrësit e shërbimeve publike të komunikimeve elektronike të njoftojnë, nëpërmjet mjeteve të informimit publik, çdo ndryshim në tarifat e shërbimeve, jo më pak se 7 ditë përpara hyrjes në fuqi të tyre ose të ndryshimeve dhe ky njoftim duhet të bëhet jo më pak se 3 ditë rresht.
Sipërmarrësit e shërbimeve publike të komunikimeve elektronike duhet të publikojnë në faqen e tyre të internetit kushtet e përgjithshme të kontratave tip dhe t’ia paraqesin ato AKEP-it për vlerësim, të paktën, 15 ditë para publikimit sipas nenit 98 pika 5 të Ligjit 9918/2008.
Lidhur me modifikimet e kontratave rregullorja përcakton se sipërmarrësit e shërbimeve publike të komunikimeve elektronike duhet të njoftojnë për jo më pak se 30 ditë përpara.
“ Sipërmarrësit, të cilëve AKEP u ka vendosur detyrime të veçanta për tarifat me pakicë, duhet të aplikojnë afatet dhe rregullat e përcaktuara nga AKEP në mënyrë specifike. Përcaktimet e mësipërme janë të detyrueshme për t’u zbatuar për të gjitha paketat e shërbimeve, me parapagesë ose me paspagesë, paketa standarde, oferta, etj” vlerëson draft rregullorja.
Mirëpo, edhe një herë Vodafone doli jashtë kornizave.
