Dy ditë më parë, “Instagram”-i prezantoi një projekt, për të gjithë ata persona që postojnë shumë fotografi njëherësh, ndërsa nga dje rrjeti social e vendosi në zbatim.
Të gjithë kemi në listën e ndjekësve të paktën një person, i cili bëhet shumë “i bezdisur”, duke postuar pafund ose ai personi mund të jeni ju. Për këtë “Instagram”-i solli zgjidhjen e duhur!
Rrjeti social sapo prezantoi opsionin e postimit të albumeve, ku mund të përfshini në një postim të vetëm deri në 10 foto ose video. Ngarkimi i një albumi funksionon si postimi i çdo fotoje apo videoje, veçse tashmë mund të klikoni opsionin e ri “select multiple” për të përzgjedhur më shumë se një.
Pasi t’i keni përzgjedhur, mund t’i vendosni secilës foto filtrin që dëshironi dhe të etiketoni miqtë tuaj në to. Fotot dhe videot në album do të rreshtohen në rendin që ju përcaktoni, në mënyrë që të jepet ideja e një historie. Në momentin e postimit, ndjekësit tuaj do të kenë mundësinë të shfletojnë albumin horizontalisht.
Por fillimisht duhet që të bëni “update” programin në celularin tuaj, ndërsa “Instagram”-i shkruan në të se, ky opsion do të jetë në dispozicion, në mbarë botën brenda pak javësh.
Burimi: Mashable
