Plani i mbërritjes së afganëve në Kosovë mbrëmjen e sotme ka ndryshuar dhe mësohet se grupi i qytetarëve që do të strehohen përkohësisht atje, pritet të mbërrijë të ditën e nesërme (dielë) rreth orës 19:00 në aeroportin e Prishtinës.
Zëri i Amerikës ka mësuar se bëhet fjalë për pak më shumë se 100 persona, që kanë punuar si kontraktorë të Natos, të cilët do të jenë së bashku me familjet e tyre, ndërkohë që akoma nuk ka informacione shtesë se ku do të strehohen ata.
Ndërkohë autoritetet kanë bërë të ditur se do të strehojnë rreth 2 mijë qytetarë afganë që do të priten në Kosovë në ditët në vazhdim.
Qeveria e Kosovës ka miratuar kërkesën “për dhënien e mbrojtjes së përkohshme dhe të menjëhershme personave të rrezikuar nga konflikti i brendshëm në Afganistan, të cilët janë në proces të aplikimit për Viza të Veçanta Imigruese (SIV) – të Shteteve të Bashkuara të Amerikës, përfshirë familjet e tyre”.
Shtetet e Bashkuara kërkuan nga Kosova dhe Shqipëria që të pranojnë një numër afganësh që kanë punuar me forcat amerikane, të cilët ndjehen të frikësuar për jetën dhe të ardhmen e tyre nga hakmarrja e talebanëve, që morën nën kontroll vendin pas tërheqjes së trupave të huaja. / VOA
