Ajo arriti kulmin e suksesit si vokaliste e grupit “The Pussycat Dolls”, e cila ka shitur mbi 50 milionë kopje.
Në mes të suksesit euforik të grupit, Nicole Scherzinger ka vuajtur shumë nga beteja sekrete me buliminë. Ajo ka treguar se problemet me format e trupit nisën kur ajo ishte vetëm 14 vjeçe, aq sa vraponte në mes të natës për të patur këmbë të holla.
Në një intervistë të dhënë për numrin e fundit të revistës “Cosmopolitan”, anëtarja e jurisë së “X Factor”, ka treguar se çrregullimi në ushqim e ka lënë atë të brengosur dhe i ka vjedhur lumturinë.
“Tani e pranoj trupin tim. Kam qenë gjithmonë shumë kritike e vetes sime që në moshë të re. Kur isha 14 vjeçe dilja jashtë në mes të natës dhe vrapoja, sepse mendoja se duhet të isha më e dobët dhe këmbët e mia duhet të dukeshin ndryshe. Kur u bashkova me “The Pussycat Dolls” kjo u përforcua, sepse duhet të tregoja më shumë trupin tim”, ka rrëfyer Nicole.
Duke folur për betejën e saj me buliminë, ajo shtoi: “Ishte si burgosje dhe vodhi gjithë lumturinë, besimin dhe kujtimet e mia”.
Nicole pranoi se çrregullimi vazhdoi sidomos kur ishte pjesë e “The Pussycat Dolls”, grup i cili u formua në vitin 2004 dhe pati sukses të madh nga viti 2005 deri në vitin 2010.
Burimi: Daily Mail
