Mjeshtri i valles popullore shqiptare, Besim Zekthi ka ndërruar jetë në moshën 84-vjeçare.
Artisti humbi betejën me një sëmundje të rëndë, në shtëpinë e tij në Tiranë.
Teatri Kombëtar i Operës dhe Baletit dhe Ansamblit Popullor, i shpreh ngushëllimet familjarëve, të afërmve, miqve, bashkëpunëtorëve dhe spektatorëve që e duartrokitën gjatë gjithë karrierës së tij mjeshtrin e valles shqiptare, të pazëvendsueshmin, Besim Zekthi.
Besim Zekthi i cili lindi më 5 shkurt 1936 në Tirane ishte kërcimtar, mjeshtër i valles popullore shqiptare, solist i pakrahasueshëm i Ansamblit të Këngëve dhe Valleve Popullore, i cili shkëlqeu veçanërisht në vallet e njohura “Vallja e shqipeve” dhe “Festë ka sot Shqipëria” dhe një ndër protagonistët kryesorë që i dha Gjerdanin e Artë vendit tonë në festivalin e Dizhonit në Francë në vitin 1970.
Vallja popullore shqiptare si traditë dhe vlerë kombëtare shqiptare, nuk mund të kuptohet pa përfaqësuesin e saj më të spikatur, Besim Zekthi, i cili do të mbetet nder i Kombit!
Kanë qenë pikërisht “Vallja e shqipes”, “Festë të madhe ka sot Shqipëria”, të cilat e kanë bërë atë kaq të famshëm, kaq popullor mjeshtrin e njohur!
