Ivana Trump, ish-bashkëshortja e ish-presidentit Donald Trump, ka vdekur në moshën 73-vjeçare.
“Nëna jonë ishte një grua e jashtëzakonshme, një forcë në biznes, një atlete e klasit botëror, një bukuri rrezatuese, nënë dhe mike e kujdesshme. Ivana Trump ishte një e mbijetuar. Ajo iku nga komunizmi dhe e përqafoi këtë vend. Ajo i mësoi fëmijët e saj për guximin dhe ashpërsinë, dhembshurinë dhe vendosmërinë”- tha familja Trump në një deklaratë.
Raportohet se Ivana pësoi një arrest kardiak, në moshën 73-vjeçare në apartamentin në Upper East Side ku jetonte pak pas orës 12:30 të enjten.
Në një deklaratë në platformën e tij “Truth Social”, Donald Trump e kujtoi Ivanën si një “grua të mrekullueshme, të bukur dhe të mahnitshme, e cila bëri një jetë të mrekullueshme dhe frymëzuese”.
“Krenaria dhe gëzimi i saj ishin tre fëmijët e saj, Donald Jr., Ivanka dhe Eric”, ka shkruar ai. “Ajo ishte aq krenare për ta, ashtu siç ishim të gjithë aq krenarë për të.”
Ivana Trump ishte gruaja e parë e Donald Trump. Ata kanë tre fëmijë së bashku: Donald Jr., Ivanka dhe Eric Trump.
Ivana Trump, e cila u rrit nën sundimin komunist në ish-Çekosllovaki, u martua me Donald Trump në vitin 1977. Çifti u divorcua në 1992.
