Ndërron jetë në moshën 31-vjeçare gazetarja e njohur Adelajda Xhamani.
Adelajda është ndarë nga jeta në shtëpinë e saj, orët e para të mëngjesit të sotëm, si pasojë e një ataku kardiak.
Ajo u bë e njohur në vitin 2009, pasi ishte pjesë “Big Brother”, ku doli e dyta.
Xhamani mbaroi studimet për Gjuhë Letërsi dhe pasi u bë pjesë e botës televizive, ndoqi pasionin e saj për letërsinë e shkrimin, duke u bërë pjesë e gazetarisë.
Prej vitesh Adelajda punonte në shtypin rozë. Ajo mbante aktualisht postin e kryeredaktores në një revistë dhe së fundmi u bë pjesë e një televizioni informativ.
Kush ishte Adelajda:
E mbajmë mend në edicionin e dytë të “Big Brother”, e cila u paraqit si një mësuese nga Kavaja dhe u dashurua me Bjordin, njërin nga konkurrentët e spektaklit, edhe pse jashtë kishte lënë të fejuarin e saj.
Adela arriti në fund të spektaklit, duke fituar çmimin e dytë, por pas mbarimit të “Big Brother” nuk ndali me aq.
Shumë shpejt filluam ta shihnim nëpër mediat shqiptare, në televizione të ndryshme, si gazetare, moderatore.
Ajo iu përkushtua shtypit rozë, u bë kryeredaktore në një revistë dhe së fundmi kishte një projekt të ri.
31-vjeçarja do të kishte një emision të sajin në një televizion të ri informativ.
Intervista e saj e fundit është dhënë në emisionin e Rudinës,më 12 shtator të këtij viti.
Nuk dihet nëse Adela ka vuajtur më parë nga probleme me zemrën, apo gjithçka ka ardhur në mënyrë të papritur.
Ajo do të festonte ditëlindjen e saj të 32-të pas pak ditësh më 5 nëntor.
“Iconstyle.al” i shpreh ngushëllime familjarëve të saj për këtë humbje të papritur.
