Punimet për shembjen e Krahut Lindor të Shtëpisë së Bardhë ndodhen në fazë të avancuar, me imazhe satelitore që tregojnë madhësinë e ndërhyrjes në këtë kompleks historik. Shembja po kryhet për të hapur rrugën ndaj ndërtimit të sallës së re të dasmave dhe eventeve, një projekt që është njoftuar nga presidenti Donald Trump.
Krah i cili tradicionalisht strehonte zyrat e Zonjës së Parë tashmë është zhdukur nga peizazhi, ndërsa makineritë e rënda largojnë mbeturinat dhe rrënojat. Në vendin ku ndodhej kolona klasike, makineritë vazhdojnë të pastrojnë mbetjet, ndërsa korniza e kolonave që lidhte Krahun Lindor me ndërtesën kryesore është pothuajse e hequr plotësisht. Vetëm një pjesë e vogël, e lidhur me Rezidencën Presidenciale, ka mbetur e paprekur.
Përveç shembjes, kanë nisur punimet paraprake për ndërtimin e sallës së re të dasmave. Disa pjesë të terrenit janë gërmuar për themelimin e ndërtesës, ndërsa një betonierë është vendosur pranë godinës së Ministrisë së Financave, gati për t’u përdorur.
Zëdhënësja e Shtëpisë së Bardhë, Caroline Leavitt, deklaroi se projekti ka marrë përmasa më të mëdha se sa ishte parashikuar, por qeveria është “plotësisht transparente” për përparimin e tij. Ajo shtoi se çdo punim ka ndryshime gjatë zbatimit dhe publikimi i hershëm i planeve ishte një mënyrë për të informuar qytetarët.
Ky projekt, i cili synon të shtojë një sallë të madhe dhe madhështore në kompleksin presidencial, ka ngjallur debate mbi ndikimin e ndërhyrjes në karakterin historik të Shtëpisë së Bardhë dhe ndryshimet që ajo sjell në pamjen e ikonës amerikane.
