Dukesha Kate Middleton dhe bashkëshorti i saj Princi William mirëpritën sot fëmijën e tyre të tretë, një djalë.
Vogëlushi erdhi në jetë në orën 11:01 dhe peshon plot 3,8 kg. “The Sun” raporton se William do të prezantojë këtë pasdite princin e vogël George dhe princeshën Charlotte me vëllain e tyre në Spitalin Saint Mary, Paddington.
Familja mbretërore thuhet se është shumë e lumtur me lajmin. Në një deklaratë zyrtare, Pallati Kensington njofton:
“Lartësia e saj, Dukesha e Kembrixhit lindi një djalë në orën 11:01. Fëmija peshon 3,8 kg. Duka i Kembrixhit ishte i pranishëm në lindje. Lartësia e saj dhe fëmija janë të dy mirë. Mbretëresha, Duka i Edinburgut, Princi i Uellsit, Dukesha e Cornwallit, Princi Harry dhe anëtarët e të dy familjeve janë informuar dhe janë të lumtur me lajmin”.
Stilistja e flokëve të Kate, Amanda Cook Tucker u pa duke lënë spitalin dhe shkaktoi spekulime se mund të jetë duke përgatitur Kate për të dalë në publik me foshnjën në krahë.
Dy lindjet e mëparshme të 36-vjeçares kanë qenë çështje mjaft të shpejta – Kate lindi George më pak se 11 orë pas mbërritjes në spital më 22 korrik 2013, ndërsa Charlotte lindi vetëm dy orë e 34 minuta pas mbërritjes në spital më 2 maj , 2015. Fansat mezi po presin dhe kanë mbushur ambientet e jashtme të spitalit për të parë vogëlushin.
