Lajmin e ndarjes nga jeta të tij e bënë të ditur agjencitë e lajmeve të Vatikanit, që njoftuan se 95-vjeçari mbylli sytë përgjithmonë në orën 09:34 të mëngjesit të sotëm, në manastirin Mater Eklezie në Vatikan, ku jetonte prej 9 vitesh, pasi u dorëhoq si Papë.
Benedikti i XVI ishte prej ditësh në gjendje të rëndë shëndetësore dhe këtë e njoftoi edhe Papa Françesku më herët gjatë kësaj jave, kur u kërkoi besimtarëve të luteshin për të.
Trupi i tij do të vendoset për homazhe për gjithë besimtarët në Bazilikën e Shën Pjetrit, duke nisur nga e Hëna e 2 Janarit, ndërsa zyrtarët e Vaktikanit pritet të publikojnë edhe planin e homazheve dhe datën e ceremonisë së përcjelljes për në banesën e fundit.
Jozef Ratzinger do të mbahet mend si i pari Papë që dha dorëheqjen në 6 shekujt e fundit, si dhe i pari gjerman në 1 mijë vite në krye të Kishës Katolike.
Në 2005, ai u zgjodh në krye të Vatikanit kur ishte 78-vjeç dhe u konsiderua si Papa më i vjetër. Moshën kishte si argument kur dha dorëheqjen 8 vite më vonë, me vendimin që surprizoi gjithë botën.
Benedikti XVI mori drejtimin kur Kisha Katolike përballej me skandalin e abuzimeve seksuale të klerit me fëmijët.
