Me hidhërim të thellë, komuniteti artistik shqiptar njofton ndarjen nga jeta të aktores së shquar Margarita Xhepa, e cila u shua sot në moshën 93-vjeçare, vetëm një ditë pas ditëlindjes së saj.
E lindur më 2 prill 1932 në Lushnjë, Margarita Xhepa ishte një prej figurave më të rëndësishme të teatrit dhe kinematografisë shqiptare. Gjatë karrierës së saj të gjatë dhe të pasur, ajo interpretoi mbi 150 role në teatër dhe 32 role në kinematografi, duke lënë gjurmë të pashlyeshme në artin shqiptar.
Xhepa u bë e njohur për interpretimet e saj të shkëlqyera në vepra të dramaturgjisë shqiptare dhe botërore, duke përfshirë role në “Hamleti”, “Mbreti Lir” dhe “Romeo dhe Zhulieta”. Ajo u vlerësua me titullin “Artiste e Popullit” për kontributin e saj të jashtëzakonshëm në art.
Gjatë karrierës së saj, Xhepa ka interpretuar në filma të njohur si “Gjeneral gramafoni” (1978), “Dora e ngrohtë” (1983) dhe “Apasionata” (1983).
Aktorja ndërroi jetë pas një periudhe të shkurtër sëmundjeje të mushkërive dhe u shua në një spital privat në Tiranë.
Lamtumira e fundit për Margarita Xhepën do të jepet nesër, më 4 prill.
Humbja e saj lë një boshllëk të madh në skenën artistike shqiptare, por trashëgimia e saj do të mbetet e gjallë për brezat që vijnë.
