Aktori i njohur i kinematografisë shqiptare, Pandi Siku, është ndarë nga jeta në moshën 73-vjeçare.
Siku ishte një aktor shumë i suksesshëm i teatrit dhe filmit shqiptar dhe pati një karrierë të gjatë me role të spikatura. Vdekja e tij është një tjetër humbje e madhe për kinematografinë shqiptare.
Pandi Siku lindi në Tiranë, më 28 korrik. Pas mbarimit të Institutit të Lartë të Arteve, dega e dramës, më 1972, filloi punë në Teatrin Popullor. Aktiviteti i tij artistik vazhdoi deri më 2001, kur emigroi në SHBA, në shtetin Illinois.
Ai ka luajtur në teatër, në shfaqjet e famshme “Epoka para gjyqit” (rolin e Shpend Dragobisë, 1978), “Furrnalta” (rolin e Bardhit, 1979) më të cilin fitoi çmimin e “Aktorit më të mirë” në rolet e dyta, “Komunistët” (Rrema, 1981), “Romeo dhe Zhuljeta” (Merkucio, 1987), “Dy zotërinj nga Verona” (Valentini, 1990), “Quo Vadis” (pjesëtar i Korit, 1997), më të cilin fitoi çmimin e “Aktorit më të mirë” për role të dyta.
Filmat ku ka interpretuar: 1971, Kur zbardhi një ditë; 1973, Brazdat (Ademi); 1977, Njeriu me top (Adnan Pinxho); 1977: Një udhëtim i vështirë (Sokoli); 1978: Kur hidheshin themelet (Mani); 1979: Mysafiri; 1984: Fushë e blerte, fushë e kuqe (Misto); 1984: Koha nuk pret (agjent sigurimi); 1987: Këmishët me dyllë (Koburja); 1988: Shpresa (Niko); 1988: Tre vetë kapërcejnë malin (Kico Zgurra); 1990: Fletë të bardha.
